DILI-ekipa Assalam Fc taka Ponta Leste nia dalan ba kampiaun, hafoin impata 1-1 iha jogu jornada daneen Liga Fútebol Timor Leste (LFTL) epoka 2021 ne’ebé mak hala’o iha estadium munisipal Dili kinta (16/12)
Jogu hahu ekipa Assalam tun ho nia jogador selesaun nasional nain 4 ne’ebé foin fila husi Singapura hanesan, Jovanio Braz, Junildo Pereira, João Soares, Jaimitu Soares, enkuantu Ponta Leste nia jogador na’in tolu Yohanes Gusmão, Armindu de Almeida, Anizu Correa tun iha segunda parte.
ho prezensa jogador na’in 4 ne’e halo Assalam nia jogu iha mudansa bo’ot ba sira nia ekipa hodi pressaun maka’as ba Ponta Leste nia lina defensivu.
Maibé iha minutu 13 sorte a’at akontese ba Assalam fc, hafoin deveza Riky Permana hamonu Expeditu da Conceincão iha parte los halo arbitu Pedro Maia Carvalho deside ba suta falta.
Jogador Ponta Leste Revilinu Martin lansa suta falta monu ba Mohamed Momy nia ulun halo guarda rede Assalam Fc Junildo Pereira labele salva bola ho diak, ikus mai rede nakdoko hodi hatur eskor ba 1-0.
Eskor ne’e halo Assalam Fc nia jogu lamonu hodi fo pressaun ba Ponta Leste liu suta livre Hasam Ramos iha lina penalidade kotuk, maibé guarda rede Ponta Leste Albino Ximenes salva bola ho di’ak.
Hakat ba minutu 37 Assalam responde golu ida husi jogador Agusto da Costa, hafoin guarda rede Ponta Leste Albino Ximenis simu bola muta ba rede laran hodi hatur eskor ba 1-1 to’o jogu primeira parte remata.
Segunda parte, treinador Ponta Leste Francisco Araujo halo mundansa jogu hodi hatama fali jogador Armindo Alemeida,Yohanes Gusmão no Anizu Coreia hodi reforsa lina avansadu, mediu no mediu atakante.
Treinador nia mundansa hirak ne’e halo Ponta Leste nia ritmu jogu kontinua aumenta hodi dumina bola husi ain ba ain, maibé difisíl sobu lina deveza Asslam fc ne’ebé mak komanda husi João Soares ho naran istimadu Ajompe.
Iha minutu balun Hasam Ramos lori Assalam fc atu lidera eskor, maibé bola ne’ebé mak nia suta iha lina penalidade kotuk sei salva husi guarda rede Ponta Leste Albino Ximenes to’o jogu remata eskor mantein 1-1.
About Post Author
