Dili-Emmanuel Fc halo festa golu kontra Kablaki Fc ho skor 7-0 iha jogu jornada datoluk grupu B, Liga Futeból Timor Leste (LFTL) segunda divizaun époka tinan ne’e.
Jogu entre ekipa rua iha stadium Munisipal Dili, Sábadu (06/11), iha jogu primeira parte, ekipa rua tun ho tátiku no ritmu jogu hanesan tanba bola husi ain ba ain hodi kontra atake ba malu.
Oportunidade ba Emmanuel Fc dala tolu tuituir malu hodi fó ameasa ba Kablaki FC nia guarda rede, maibé la rejulta golu tanba liña defeza Kablaki mantein sira nia disiplina jogu.
Ekipa rua nafatin esforsu atu buka oportunidade se mak lidera uluk golu, liu husi halo kontra atake ba malu ho bola ain ba ain atu sobu liña defeza ida-idak.
Maibé liña defeza ekipa rua mantein lina metin atu salva sira nia ekipa husi sofre golu.
Hafoin iha minutu 31 Emanuel lansa golu ba Kablaki FC, liu husi jogadór Carolino Correia bainhira simu bola asisténsia kruza husi Zinedine Lopes hodi muda skor 1-0.
Iha minutu 35 jogadór liña defeza Emmanuel FC nian, Bernardino Sena tenki hetan kartaun kinur tanba kontra regra jogu.
Ekipa Kablaki Fc nafatin esforsu atu buka dalan atu responde hikas sofre golu husi nia adversáriu, maibé defeza Emmanuel FC nian mantein sira nia liña metin.
Oportunidade nafatin monu ba Emmanuel FC liu husi jogadór Jeferino Nheu banhira suta bola livre hodi rejulta golu daruak ba iha minutu 40 (Hatnulu).
Jogadór Kablaki FC tenta nafatin halo kontra atake ba Emmanuel FC, maibé la iha dalan atu sira liu defeza husi nia adversáriu.
Tanba ne’e iha minutu 43 (Hatnulu resin tolu) jogadór Kablaki Fc nian, Acoli Maia tenki simu kartaun kinur.
To’o jogu primeira parte termina skor ba Emmanuel Fc lidera 2-0.
Hafoin hakat ba jogu segunda parte, Kablaki Fc tenta halo mudansa ba nia jogadór hodi dada sai liña mediu Oligario Nunes no hatama Horacio Martins.
Maske Kablaki Fc halo subtituisaun ba nia jogadór, maibé susar tebes ba sira atu muda skor ne’ebé sira simu.
Tanba Emmanuel Fc hatudu sira nia ritmu jogu di’ak tebes.
Nune’e iha minutu, 46 jogadór Filomeno Xavio lidera tan golu datoluk hodi muda skor 3-0.
Atu salva Emmanuel Fc husi golu ne’ebé sira hetan, nia tenki halo subtituisaun ba nia jogadór liña klaran Zinedine Lopes hodi aumenta liña defeza Alexandre Morreira atu haforsa sira nia ekipa.
Jogadór Kablaki Fc nafatin esforsu, husi liña ba liña tenta passa bola ba malu atu muda sira nia sofre golu, maibé la iha oportunidade atu hatama golu.
Jogadór Emmanuel Fc Filomeno Xavio lidera tan golu dahat iha minutu 55.
No iha minutu, 68 Emmanuel nafatin lidera golu dalimak ho skor 5-0, liu husi jogadór Mario Quintão bainhira aproveita bola, bainhira baliza Kablaki Fc nian tenta sai husi nia fatin.
Maske Kablaki Fc sofre golu 0-5 husi nia adversáriu, maibé sira nafatin esforsu joga hasoru nia adversáriu.
Ekipa Emmanuel Fc nafatin halo subtituisaun ba nia jogadór sira atu mantein salva sira ekipa atu labele sofre golu.
Maibé Emmanuel nafatin iha sorte bot, tanba iha minutu 73 (Hitunulu resin tolu) Alexandre Morreira lidera tan golu daneen, hodi muda skor 6-0.
Hafoin tama tan ba minutu 86 (Ualunulu resin neen), Emmanuel FC lidera tan golu dahitu, liu husi jogadór Carlos Soares hodi lori sira ekipa hatur ho skor 7-0. Tanba ne’e to’o jogu segunda parte remata, vitória ba Emmanuel Fc lidera ho skor 7-0.
About Post Author
