DILI-Nagardjo FC ho pontus tolu (3) iha pozisaun da ha’at grupu B atu buka dalan hodi hetan vitoria kontra Lica-Lica Lemorai FC hodi asegura pontus neen (6), maibé Lemorai Satan netik sira dalan ho eskor 1-1 iha estadiun munisipal Dili domingu (07/11)
Iha jogu hahu,ekipa rua hahu halo kedan atake ba malu liu husi tatika jogador ida-idak nian, maibé Nagardjo FC domina liu jogu hodi buka pontus maksimu iha jogu ne’e atu buka dalan ba primeiru divizaun.
Ekipa rua halo jogu ho velosidade maka’as, maibé eis jogador selesaun nasional Timor Leste Chiquitu hatudu nia jogu halo lina deveza Lica-Lica tenki esforsu a’an hodi tahan sira nia rede labele nakles.
Ho esforsu Chiquitu nian,ikus mai konsege sobu lina deveza hodi fo asistenti ida ba jogador Benditu Ximines hodi fora guarda rede Luis bere liu suta livre iha penalidade kotuk hodi hatur eskor ba 1-0.
Hafoin sofre golu, Lica-Lica FC fila domina hikas jogu hodi fo ameasa ba guarda rede Nagardjo Celestinu Pintu liu husi sota livre, kantu no bola falta, maibé bola ida deit mak konsege kona besi rin leten.
Nagardjo FC fila hamate Lica-Lica Lemorai FC nia jogu ne’ebé mak kalma ho bola husi ain ba ain ho bola a’as, ikus mai jogador Chiquitu atu les rede Lica-Lica. maibé bola ne’ebé nia suta sa’e liu deit besi rin leten to primeira parte termina.
Wainhira intervalu hahu, ekipa Nagarjdo FC ne’ebé mak komanda husi treinador Miguel Soares halo mundansa jogu hodi uza avansadu rua deit no jogador tun hodi tahan deveza, enkuantu treinador Lica-Lica Lemorai FC Nelson Soares responde ho jogu presaun ho bola a’as.
Iha menutu (Nennulu) 60 jogador Nagardjo fc Fortunatu Ximenis hamonu Lica-Lica Lemorai FC nia jogador Mario Panao iha garis penalidade laran hodi halo arbitu Francisco Pereira tenki foti dezisaun ba penalty.
Jogador Miguel Barretu ne’ebé mak avansa hanesan ezukatador susesu hala’o nia kna’ar hodi les Celestinu Pintu hodi hatur eskor ba 1-1.
Eskor ne’e halo Nagardjo FC fila esforsu atu duni tuir eskor hodi manan iha jogu ne’e, maibé deveza Lica-Lica Lemorai FC la fo fatin hodi satan metin sira nia rede labele nakles ba dala rua to’o jogu termina eskor mantein 1-1.
About Post Author
