Dili – Eis jogadór ekipa Atletico Ultramar Fc, Januario Xavier Pinto susesu lori Fc Portu Taibesi hafoin halakon Zebra Fc ho skor 1-0, iha jogu abertura Liga Futeból Timor Leste (LFTL) époka 2021.
Markadór ne’e mós hateten, golu ne’ebé nia marka sai hanesan istória ida ba nia família, inan, aman no klube Fc Porto Taibessi rasik.
“Golu ohin loron ne’e hanesan motivasaun ida mai ha’u, maibé ba oin ha’u hakas aan liu tan, sei dedika tan golu barak ba Porto Taibesi”. Hateten Januario ba jornalista sira hafoin jogu remata entre ekipa rua, iha Stadium Munisipal Dili, Tersa (12/10).
Nia mós iha esperansa katak, durante preparasaun iha hanoin ona tenke marka golu, bainhira la marka golu ne’e sofre ida ba ekipa.
Ohin esforsu aan to’o minutu ikus koko ba oin ikus mai rezultadu marka golu.
Nia dehan tan, nu’udar jogadór ne’ebé marka golu iha abertura ne’e, sente kontente tebes.
Januario Xavier Pinto antes ne’e hahú joga iha ekipa Atlétiku Ultramar iha tinan 2015 to’o 2016 durante tinan rua.
Karreira ne’ebé nia iha, lamate leet de’it, tanba iha 2018, kontinua nia kareira iha mundu futeból ne’e iha Fc Porto Taibesi, wainhira hetan konfiansa husi nia belun jogadór balun.
Tanba ne’e, ekipa ne’ebé oras ne’e nia hamahon-aan ba, liu husi nia belun Euzébio, hanesan jogadór senior ida mak dada nia tama Fc Portu.
Maun ne’e hare ha’u nia talentu di’ak, enatun nia haruka ha’u buka ekipa seluk, nune’e nia lori ha’u ba Fc Porto, mak ohin loron espresa ha’u nia talentu di’ak no ema koñesidu ha’u iha Porto Taibessi ne’e”, nia haktuir.
Mane metan morenu ne’e, oras ne’e daudaun avansa ona ho idade 23.
Januario la’os sai de’it ema futebolista ida, maibé tur mós iha Banco universitáriu, hanesan iha Univeraidade Nasionál Timor lorosa’e (UNTL), iha Departamentu Komunikasaun Sosiál.
Nia hahú nia Eskola primária iha Rumbia, sekundaria iha SMP Faról Dili.
Nia konta mós katak, durante hala’o nia estudu, la hakmatek iha eskola fatin ida, maibé sempre muda ba mai. Tanba muda husi fatin ida ba fatin seluk hanesan eskola iha Vikeke depois muda ba eskola fali iha Aileu.
Mai fali Dili mak kontinua eskola terseiru siklu iha faról, Pre-sekundáriu iha Canossa, depois kontinua Universidade.
Entretantu treinadór Fc Porto Taibessi, José Monís Gomes reforsa, jogu abertura ne’e ekipa rua hatudu jogu di’ak, maibé Porto Taibessi konsege manan Zebra FC ho skor 1-0 iha 90+2 ikus.
“Ha’u fó parabéns ba ha’u nia ekipa jogadór sira liu husi sira nia esforsu hetan rezultadu ne’e di’ak”
Treinadór ne’e mós promete sei hadi’a, di’ak liu tan iha jogu tuir mai.
“Hanesan ohin ita hotu akompaña halo falta no fó oportunidade ba ema ida ne’e mak hanesan esperiénsia ida ba ami atu hadi’a tan” hakotu treinadór ne’e. (Desportu.xyz)
About Post Author
