DILI – Relasiona ho Sporting Klubu de Timor ne’ebé mak deside hodi rejigna husi jogu segundu divizaun Liga Fútebol Timor Leste (LFTL) epoka 2021, maibé klubu Atletic Ultramar dada hikas jogador 13 no treinador hodi ba rejistu fila fali iha LFTL hanesan jogador foun.
Jogador 13 no treinador ne’ebé mak muda ba klubu Atletic Ultramar mak hanesan, Lesi Romario Atok, Jaserlitu de Jesus, Deomentino M Madeira, Florindo Magno Soares, Carolino Gama Correia, Elias Sanches, Lesi Careca Atok, Vasco Gurca Boavida, Lexi B.Junior Atok, Elvis da Silva, Bonifacio Alves Cabral, Paulo dos S.Soares, Noel dos Santos no treinador Moises da Silva.
Tuir Treinador foun Atletic Ultramar Moises Da Silva hateten, triste tebes preparasaun Sporting nian ba LFTL epoka ida ne’e atinji ona 80%, maibé derepenti estrutura klubu foti desijaun hodi retira husi liga iha epoka tinan ne’e.
“Hau kontenti fila fali wainhira prezidente Atletic Ultramar kontaktu hau ho jogador nain 13 hodi reforsa fali Ultrmar” relata Moises ba Desportu.xyz liu husi via Whatsapp Segunda (11/10).
Nia dehan, wainhira simu kontaktu husi prezidente klubu Ultramar, hau senti orgullu bo’ot ida, tanbá hanesan treinador hau lakoi kareira ne’e labele monu no mos ba jogador nia prestasaun atu tun.
Iha jogador nain ida mak klubu Assalam bolu hanesan jogador Helder no sira seluk halo hela negosiasaun ho klubu seluk.
“Konaba atu halo karta rekonesementu ba klubu Sporting hodi muda mai Atletic Ultramar, hau lakoi halo, tanbá halo mos hanesan deit klubu rejigna ona husi LFTL” dehan nia.
Hanesan treinador foun ba klubu Ultramar, hau seidauk iha garantia atu lori klubu refere hakat ba primeiru divizaun, maibé ami sei esforsu tomak bele hakat liu bareira, tanbá ohin foin halo preparasaun.
Entertantu Tuir informasaun husi staff verifikasaun no lisensa LFTL Felisbertu M. de Jesus hateten iha sira nia pajina Liga Timorense, ohin dader iha dia 11 de Outubro 2021 Atletic Ultramar lori ona lista jogador ne’ebé mak muda husi Sporting klubu de Timor mai rejistu hanesan jogador foun ba Ultramar no husi LFTL simu ona lista ne’e ami konsidera.
About Post Author
