DILI – Sekretaario Jeral AD SLB Domingos Cairo husu ba orgaun Liga Fútebol Timor Leste (LFTL) atu muda orariu do jogu, tanbá jogador AD SLB Laulara hamutuk 13 tama iha ekipa Selesaun Nasional Timor Leste atu ba tuir jogu kualifikasi AFC cup U-23 iha fulan Outubru nia laran.
“Hau mai konsulta ona ho orgaun LFTL liu husi diretor kompetisaun oinsa mak atu hare tok hodi muda Orariu jogu AD SLB nian, tanbá maioria jogador SLB nian mak nakonu iha ekipa selesaun nasional Timor Leste” relata Domingos ba Desportu.xyz iha Xanana Sport Center Sesta foin lalais ne’e.
Nia relata, husu bot SLB labele monu orariu jogu iha loron 4 to’o loron 6 fulan Novembru, tanbá tuir informasaun ne’ebé hau hatene katak ekipa selesaun nasional ba tuir jogu kualifikasi AFC U-23 iha fulan Outubru nia laran ne’e sei fila iha loron 1 fulan Novembro no jogador sira kumpri tan karantina.
Tanbá ne’e orgaun liga presiza hare orariu SLB nian ne’e labele monu tuir iha loron ne’ebé jogador sira fila mai.
“Ba SLB orgullu ho nia jogador barak mak tama iha ekipa selesaun nasional, tanbá SLB mai ho prinspiu hodi promove jogador sira” dehan Domingos.
Se jogu ne’e laiha degradasaun ba segundu divizaun, hau hanoin laiha problema jogu ne’e bele lao deit ba, maibé desizaun sai ona katak klubu rua tenki tun ba degradasaun, tanbá ida ne’e mak ami nia preokupasaun atu hasoru diretor kompetisaun LFTL no ajuntu Sekretario Jeral Federasaun Fútebol Timor Leste (FFTL) atu buka solusaun ba asuntu refere.
Domingos haklaken, SLB husu atu muda deit ami nia orariu jogu, se lae hau hanoin foti desizaun taka tia deit hodi SLB labele tuir jogu liga iha tinan ne’e, tanbá SLB rejistu jogador hamtutuk 20 se jogador nain 13 ne’e ba joga iha selesaun nasional no nain 7 ne’e la prense ona kreteria LFTL nian.
“Karik LFTL mantein ho desizaun ne’e, hau sei enkontru fali ho prezidente klubu SLB nian hodi hare ba situasaun klubu nian ne’ebé mak agora hasoru hela”
About Post Author
