Dili-Lalenok United Fc susesu rekolla vitória kontra Assalam Fc ho skor 4-2 iha jogu dahuluk ba primeira divizaun Liga Futeból Timor Leste (LFTL) tinan ne’e.
Maske Lalenok United Fc susesu rekolla vitória ho pontu tolu husi Assalam Fc, maibé treinadór Lalenok United Gaspar Amaral dehan, nia parte seidauk kontente ho performe jogadór sira nian tanba tátiku jogu durante ne’e sira prepara la hatudu iha jogu refere.
“Hau kontente ho rejultadu ne’ebé ami hetan ho pontus tolu, maibé seidauk kontente tanba buat ne’ebé ami prepara durante ne’e sira la hatudu iha jogu laran, ida halo hau triste”. Dehan treinadór ne’e iha konfrénsia imprensa hafoin jogu remata iha stadium Munisipal dili, Domingu (14/2021).
Treinadór Lalenok United ne’e mós afirma, maske manan iha jogu dahuluk ne’e, maibé sei esforsu atu hadi’a liu tan performe jogadór sira nian.
Ami sei hadi’a liu tan husi liña ba liña, tanba jogu ohin ladun furak. Nia dehan.
Nune’e mós treinadór Assalam Fc Adu Marques rekoñese, iha jogu primeira parte nia ekipa hatudu jogu di’ak hodi halo impata 2-2, maibé hakat ba jogu segunda parte sira monu iha fisíku hodi simu derota.
Golu ne’ebé Assalam Fc sofre husi ekipa adeversáriu akontese husi bola suta kantu.
Tanba ne’e treinadór Assalam Fc ne’e dehan, falla ne’e husi parte defeza sira la kontrola liña atakante Lalenok United nian, nune’e ema aproveita bola hodi produz golu.
Assalam Fc iha jogadór foun estranjeiru na’in lima, maibé foin na’in tolu mak ohin hatun ona iha jogu kontra Lalenok United.
About Post Author
