Dili-Iha jogu abertura primeira divizaun Liga Futeból Timor Leste (LFTL) époka 2021, Karketu Dili Fc lori fila nia mehi hafoin rekolla pontus 3 husi Aitana Fc.
Jogu entre ekipa rua iha Stadium Munisipal Dili, Sexta (12/11), foin tun iha jogu hahú ekipa rua hatudu sira nia tátiku no ritmu jogu kuaze hanesan, tanba pasa bola husi ain ba ain ba malu.
Maibé ekipa rua iha ambisaun bot hakarak hadau malu atu hatama uluk golu, liu husi kontra atake ba Malu.
Tanba hafoin iha minutu balun, Karketu Dili Fc hahú lansa kedas amesa dala rua tuituir malu ba rede Aitana Fc nian.
Enkuantu Aitana Fc mós hatudu sira nia personalidade kontra atake fila hodi lansa mós ameasa ba rede Karketu Fc.
Atu hadau malu ba pontu husi tabela klasifikasaun iha kompetisaun LFTL primeira divizaun, époka tinan ne’e, ekipa rua mantein liña metin atu asegura husi golu.
Jogu entre ekipa rua kompetitivu tebes, tanba ekipa rua nafatin halo kontra atake ba malu.
Maibé iha observasaun iha kampu laran, Karketu Dili Fc dumina liu bola no halo ameasa barak liu ba Aitana Fc nia rede hodi halo guarda rede Yusak Rediauw tenki salva bola husi adversáriu.
Ameasa ne’ebé Karketu Dili Fc lansa, halo Aitana Fc nia jogadór sira nafatin defende sira nia ekipa atu mantein skor hanesan.
Tanba ne’e to’o jogu primeira parte termina, skor ba ekipa rua, mantein 0-0.
Hafoin hakat ba jogu segunda parte, ekipa rua nafatin halo atake ba malu, maibé la iha rejultadu golu ruma ba ekipa ida-idak.
Oportunidade osan mean ba Karketu Dili Fc, tanba jogadór Silvestre Gama lori bola tama area liña 16 Aitana Fc nian, maibé suta bola liu de’it husi rede liur hodi halo adeptus sira haklalak tebes.
Ameasa ne’e halo liña defeza Aitana Fc nian tenki serbisu makas husi liña ba liña, tanba Karketu Fc halo atake ba area Aitana Fc hodi lansa mós ameasa.
Avansadu Aitana Fc Edit Xavio, hanesan jogadór prinsipal iha liña oin, ne’ebé transfere husi eis Klubu Boavista Fc nian, ohin la iha oportunidade lori bola liu area Karketu nian, tanba defeza sira mantein liña metin.
Aitana Fc atu salva sira nia ekipa husi golu, Gabriel da Costa tenki simu kartaun kinur iha minutu 25 (Ruanulu Resin Lima).
Sorte aat ba Karketu Dili Fc ho naran estimadu Matak Malirin, tanba lansa suta bola ba rede Aitana Fc nian, maibé la lori rejultadu golu ruma tanba salva husi baliza.
Aitana Fc atu asegura sira nia ekipa, tenki halo kedas subtituisaun ba nia jogadór Gilbert Lay hodi hatama nia suplentu Alexandre Nogueira iha minutu 69 (Nennulu Resin Sia).
Iha minutu 73 (Hitunulu Resin Tolu) Aitana Fc nafatin halo subtituisaun ba nia jogadór parte avansadu hodi dada sai Rivaldo Correia no hatama Miguel Ximenis.
Subtituisaun jogadór Aitana Fc nian, lori sorte di’ak ba Karketu Dili Fc nia jogadór Gaudencio Monteiro hatama kedas golu iha minutu 79 (Hitunulu Resin Sia) hodi hatur skor ba 1-0.
Karketu Dili Fc atu asegura sira nia ekipa atu labele impata, tenki halo fila subtituisaun ba nia jogadór Celso Escurial no hatama Antonio Profinso.
No iha minutu 89 (Ualunulu Resin Sia) Karketu nafatin halo subtituisaun ba nia jogadór, hodi dada sai Silvestre Gama no hatama Antonio Martins.
Tanba ne’e to’o jogu termina entre ekipa rua, vitória ba Karketu Dili Fc ho skor 1-0.
About Post Author
