DILI – Assalam FC nu’udar ekipa dahuluk ne’ebé kompleta jogu dala tolu hodi pasa lakon ida manan rua no rekolla pontu 6 asegura fatin ba Jogu oitavu finais. Jogu datoluk hasoru ekipa delegadu Munisípiu Baucau Zebra FC, Asalam ho susu manan ekipa antigu ne’e ho golu boot.
Ekipa Zebra FC halo surpreza hafoin jogu iha estádiu munisipál Dili Kinta (10/09) lidera hosi árbitru Eufrazio tenke hatudu pontu mutin liña half line kampu sentrál iha minutu tolu.
Tanba jogu foin hahú, ekipa famozu ho naran kulugisa ne’e ninia jogadór kamizola 10 (Antonio de Jesus), loke bola ba grande area laran simu hosi jogadór kamizola 13 (Elvis da silva) fura rede Assalam hodi loke golu dahuluk.
Iha minutu 19 Assalam foin fó resposta ba Zebra liu hosi jogadór kamizola 7 Hasan ramos marka golu ida liu hosi kolaborasaun oferta hosi jogadór kamizola 6, (Calistro Pereira) nune’e ekipa rua lori malu ba empate 1-1, rezultadu ne’e mantein to’o primeira parte termina.
Tama segunda parte, tama iha minutu 59, akontese golu bonitu hosi Assalam ba Zebra, jogadór kamizola 22 (Martinho Belo) assist ba jogadór kamizola 17 Bonarudin Amin hodi obriga guarda rede Zebra FC ba hili bola iha rede laran ba dala rua.
La kleur de’it akontese bola crossing hosi jogadór kamizola 8, (Osorio Gusmão ) pasa ba kamizola 22 nia ain, hodi assist dala ida tan ba kamizola 17 hodi les rede Zebra FC ba datoluk.
Tuir tan akontese golu hosi Assalam hosi jogadór kamizola 7, Hasan Ramos ne’ebé hetan pasajen long hosi defeza nia ho lais lori tama area risku no la xave metin hosi liña kotuk zebra nian nune’e hamosu golu ba dahat.
Zebra sofre liu tan iha tempu rohan jogu nian, iha minutu 88, Asalam hatama golu dalimak nian hosi jogadór kamizola 17, Hasan Ramos hafoin hetan oferta hosi jogadór kamizola 17. No Asalam ne’ebé sofre uluk golu ne’e fila lidera fali ho rezultadu 5-1.
Assalam FC hala’o ona jogadór dala tolu, iha abertura hasoru Lalenok United 2-0, jogu daruak kontra DIT FC, Manan 3-1 no jogu datoluk manan Zebra 5-1, ho rezultadu ne’e Assalam-FC hein empate de’it ho Santa-Crus FC hodi hakat liu iha kualifikasaun grupu ne’e A. (eugenio)
About Post Author
