Dili – Tuir Sekretáriu Jeral AD-SLB Laulara Domingos Caero informa, sira nia ekipa sofre liu ba janela transférensia jogadór iha époka tinan ne’e, tanba sira nia jogadór xave importante sira kuaze muda hotu ba klubu seluk.
“Ami nia jogadór vaxe na’in hat mak muda ba klubu Boavista Fc de Timor, hanesan Mouzinho, Jhon Frith, Filipe no Baca, no junior sira seluk mós muda ba klubu seluk, maibé sira seluk ne’e hakarak husu atu muda duni”. Hateten Sekretáriu jeral ne’e iha FFTL, Campo denokrasia Segunda (15/02/2021).
Sekretáriu jerál ekipa Makikit de Laulara ne’e afirma tan, maske jogadór xave sira ne’e muda ba klubu seluk, maibé sira la hakfodak ba Liga Futeból Timor Leste tinan ne’e, no la depende de’it ba jogadór sira ne’ebé sai, tanba sira nia stok jogadór sei sufisiente.
Husi jogadór xave sira muda ne’e, ema komesa kolia AD-SLB Laulara komesa araska, maibé hanesan hau kolia katak, ami iha juvinil ne’ebé nakonu hela de’it atu taka lakuna sira ne’ebé iha.
Mesmu ke ita hatene katak SLB mak produz ona jogadór barak ba joga ona iha rai liur, hanesan Cornelis joga iha España, José Fonseca joga iha Tailandia no agora João Pedro iha hela prosesu atu joga iha Malaysia, maibé ami la tau hanesan jogadór melhor iha ekipa, tanba ami nia objetivu hakarak prepara fini di’ak hodi kontribui ba selesaun ekipa nasional nian.
Sekretáriu jerál ne’e esklarese, tuir orientasaun maun bot Kay Rala Xanana nian katak, AD-SLB Laulara la hanoin atu sai kampeaun iha Liga Futeból Timor Leste, maibé sira hakarak prepara jogadór sira, nune’e bele kontribui ba ekipa selesaun nasional ba Futeból mane no feto, inklui basketball no voleibol.(Vidal).
About Post Author
