DILI-klubu Ad SLB Laulara soseu konkista vitoria iha jogu daruak Liga Fútebol Timor Leste (LFTL) hafoin baku fila nia adversario DIT Fc ho eskor 4-1 iha estadiun Dili tersa (23/11)
Ho vitoria ne’ebé mak Ad SLB Laulara ho naran istimadu Makikit Laulara hetan husi avansadu na’in rua Alexandro Ima Kefy no Jermias Batista hodi halo Ad SLB fiar a’an liu tan tur iha tabela klasifkasaun segundu ho pontos 4.
Enkuantu DIT Fc iha ameasa nia laran, tanbá husi jogu dalarua kontra Karketu no Ad SLB nunka hetan derota hodi halo DIT iha jona mean.
Ekipa rua hahu jogu ho ritmu ne’ebé as, maibé ho klima udan halo DIT Fc tenki sofre uluk golu iha menutu 6 liu husi jogador Alexandro Ima Kefy, hafoin simu bola kruza husi nia kompaneru Jermias Batista hodi hatur eskor ba 1-0.
Kondisaun klima halo DIT Fc nia jogu monu total halo Ad SLB domina bola liu husi ain ba ain difisil liu ba DIT atu hetan bola hodi fura rede Ad SLB, tanbá deveza ne’ebé mak komanda husi Felipi Oliviera taka dalan metin.
Iha menutu 7 jogador Felipi Oliveira aproveita suta bola falta iha lina penalidade kotuk hodi monu ba jogador Jermias Batista nia ain halo guarda rede DIT Fc Ricardo Nunes tenki simu golu ba daruak hodi hatur eskor ba 2-0.
ho eskor ne’e halo DIT Fc koko atu halo mudansa tatika jogu hodi hamate bola husi Ad SLB hodi uza bola as atu koko tama area defensivu lina kotuk adversario nian, maibé susar ba avansadu Anitu Almeida no Serafin Baretu atu halo ameasa bola rede Ad SLB.
Jogador Ad SLB Alexandro Ima Kefy kontinua hakerek nia naran iha kuadro ba dalarua iha menutu 45+1, bainhira jogador refere aproveita bola baralha hodi les rede Ricardo Nunes hodi taka primeira parte ho eskor 3-0.
Segunda parte hahu DIT fc halo mudansa jogu hodi hasai jogador Serafin Baritu hodi hatama fali Jose Almeida hodi reforsa iha lina avansadu.
Mudansa ne’ebé mak DIT Fc halo seidauk lori resultadu signifikante ba sira nia ekipa, tanbá Ad SLB fila doko tan rede DIT fc iha minutu 85 liu husi jogador Jermias Batista, bainhira nia ultrapasa deveza tolu hodi halo rede nakles ba dala ha’at ho eskor 4-0.
Golu husi Ad SLB ladura kleur, hafoin DIT fc responde golu ida ba rede Ad SLB liu husi Kabesada Jose Almeida wainhira hetan bola husi jogador Vencelau Fatima hodi taka jogu ho eskor 1-4.
About Post Author
