Desportu.Xyz- Ekipa Emanuel Fc, provizóriu lidera segundu tabela klasifikasaun, ho pontu 6, hafoin halakon Ultramar FC ( Coração) ho score 2-1, iha jogu kontinuasaun datoluk Liga Timorense divizaun 1, époka 2022-2023.
Jogu entre Emanuel Fc kontra Coração Fc, ne’ebé hala’o iha estadium Munisípal Dili, Domingu (12/03) ne’e, foin iha primeira parte bola sentra liña klaran, Emanuel Fc fura kedas rede Coração Fc nian, iha segundu “0,52”, liu husi jogadór Edit Xavio (10), hafoin simu bola kruza husi jogador Mário Quintão (11) husi parte karuk.
Golu ne’e la dura kleur, tanba hakat ba minutu “14”, Coração Fc responde hikas golu ba Emanuel Fc, hodi hatur score hanesan 1-1, liu husi asaun jogadór Rofino Gama (14), hafoin aproveita bola barullu iha area grandeal Emanuel Fc nian.
Jogu kontinu ho intensidade sa’e, tanba ekipa rua nafatin lansa kontra atake ba malu, maibé la iha tan golu ruma atu akontese.
Nune’e hakat ba minutu “40” Emanuel Fc konsege muda score 2-1, liu husi jogadór Edit Xavio (10), ne’ebé sutu bola livre, hafoin uktrapasa liña defensivu Coração nian.
Tanba ne’e, to’o jogu primeira parte deskansa, score ba Emanuel Fc ho 2-1 ba Coração.
Kontinua ba jogu segundu, Coração Fc tenta muda jogu no halo mós subtituisaun jogador, maibé la akontese golu ruma, tanba liña defeza Emanuel Fc nian matein kontroladu.
Enkuantu ekipa Emanuel mós kontinu subtitui mós jogadór balun, hodi hasa’e sira nia ritmu jogu, maibé la akontese golu ruma, to’o jogu segundu parte termina.
Nune’e, jogu entre ekipa rua, vitória ba Emanuel Fc ho score 2-1 ba Coração Fc.
Atu fó hanoin de’it katak, iha kompetisaun Liga divizaun 1 ba époka 2022-2023, provisória Assalam Fc mak sei lidera iha primeira tabela klasifikasaun ho pontu 7 husi jogu 3, no Emanuel okupa iha segundu tabela klasifikasaun ho pontu 6 no liu ona jogu 3. Vidal Amaral.
Tabela Klasifikasaun Liga Timorense Divizaun 1 2022/2023
About Post Author
