Dili-Treinadór husi ekipa Atletico Ultramar FC dezanima ho nia jogadór tanba iha jogu segunda parte sira la ezekuta orientasaun ne’ebé nia fó, nune’e halo ekipa Nagardjo FC halo empata 2-2 iha jogu prelimináriu ba jornada daruak nian iha grupu B ba copa FFTL tinan ne’e.
Tuir treinadór Ultramar Francisco de Araújo hateten, jogadór sira falla iha konsentrasaun no kombisaun jogu iha liña klaran, nune’e halo ekipa husi Nagardjo halo aproveitamentu hatama golu iha jogu segunda parte.
“Iha jogu primeira parte sira joga tuir hau nia orientasaun, maibé segunda parte sira la halo tuir hau nia orientasaun”. Hateten treinadór iha fatin konfrensia imprensa stadium munisipal Dili-Sabado (05/09/2020).
Tanba ne’e treinadór hatutan tan, nia ekipa labele manan tanba iha jogu segundu parte nia jogadór sira hetan bola iha liña rohan, soe fila fali ba liña klaran, tan ne’eekipa Nagardjo simu bola hodi halo atake hodi muda skor 2-1.
Tan ne’e, nia mós rekoñese iha jogu segundu parte nia jogadór sira mós resistensia tun, tan ne’e sira la bele fó rejultadu di’ak iha jogu nia laran.
Nia mós promete, iha fallansu hirak ne’e, nia parte sei hadi’a, atu nune’e jogu tuir mai labele akontese tan.
“Iha esperansa jogu tuir mai sei hadi’a fallansu hirak ne’ebé iha, nune’e hasoru ekipa rua tuir mai bele fó rejultadu ne’ebé di’ak”. Nia hakotu. (Vidal).
About Post Author
