Dili- Presidente Federasaun Futeból Timor Leste (FFTL) Francisco Jerónimo hateten, kompetisaun nasionál Juvinil “U16” ne’e hanensa faze ida atu prepara jogadór di’ak iha futuru, maske oras ne’e iha ona jogadór senior no junior, maibé nafatin presiza jogadór di’ak husi juvinil sira.
Presidente FFTL ne’e iha nia diskursu hateten tan, kontente tanba bele halo koperasaun di’ak ho SEJD atu ba futuru bele prepara tan jogadór sira, treinadór no árbitro nune’e bele lidera jogu sira ho di’ak.
“Atu informa ba alin sira katak, SEJD ho FFTL sei halo akordu ida atu diskute liu tan oinsa halo formasaun ba treinadór sira no mós formasaun ba imi juvinil ne’e, nune’e ba futuru imi bele sai jogadór di’ak iha munisipiu, nasional no nivel internasional. Bele mós sai hanesan Ronaldo, Mesi, halo ema hotu fans, no hau hanoin TL mos sei sai hanesan ne’e”. Dehan presidente FFTL ne’e iha abertura jogu nasional Centru Treinamentu Juvinil Futeból Timor Leste (CTFJTL) “Cup 2021” iha Stadium Munisipal Dili, Kinta (02/12).
Iha fatin hanesan Sekretariu Estadu Juventude no Desportu (SEJD) Abrão Saldanha hateten, apresia ho esforsu CTFJTL halo tanba bele realiza eventu juvinil cup 2021.
Menbru governu ne’e dehan tan, esforsu governu nian hakarak autonomiza jestaun Centru Juvinil Futeból sira iha timor laran hotu.
SEJD ho FFTL semana oin atu halo akordu ida ho governu Korea atu dezenvolve futeból juvinil no mos infrastrutura balun. Dehan nia.
Tanba ba ne’e nia relata tan, serbisu hamutuk ho parseria sira ne’e hamesan parte ida atu lori futeból hakat tan ba oin.
Nune’e mós presidente Centro Juvinil Futebó Timor Leste, Grigorio Correia mós relata, atividade ne’e hanesan kontinuasaun ne’ebé antes ne’e halo iha munisipiu sira hanesan, Baucau, Lospalos, Liquica, Suai no Maliana.
Ida ami halo ne’e hanesan nivel munisipiu, maibé ida ne’e hanesan nivel nasional. No orsamentu hetan apoiu husi SEJD.
Objetivu hakarak promove jogad’or foin sa’e sira nia talentu, nune’e ba futuru bele hetan fini jogadór di’ak.
Entretantu atividade ne’e rasik sei remata iha segunda semana oin.
About Post Author
