Dili – Diretór Ezekutivu DIT FC, Estaneslao Baptista informa, daduan ne’e sira halo hela kontatu ho jogadór estranjeiru balun, husi Indonésia, inklui jogadór lokal sira ne’ebé joga iha klubu rai laran atu haforsa tan sira nia ekipa iha tinan 2021.
Maibé tuir diretór ne’e katak, tanba ho situasaun Estadu Emerjenjia (EE) ba covid-19, nune’e sira sei adia hela hodi hein to’o situasaun EE normaliza, sei kontinua halo komunika, tanba ne’e iha posibilidade jogadór sira ne’ebé halo komunika sei haforsa sira nia ekipa iha tinan ne’e.
“Jogadór estranjeiru ne’ebé ekipa presiza hamutuk na’in 3 ho posizaun, avansadu, mediu no defeza sentral”. Hateten diretór ne’e, liu husi via menzajen WhatsApp, Segunda (11/01/2021).
Nia relata tan, relasiona ho jogadór rai laran sira komunika ona jogadór balun husi SLB, Ponta Leste, Karketu no Boavista atu haforsa tan sira nia ekipa, maibé seidauk serteza, maibé sira tenta nafatin halo negoziasaun.
“Espera antes tama ba liga, ekipa DIT preparadu ona”.
DIT F C hanesan mós ekipa primeira divizaun, ne’ebé hetan fiar husi treinadór ho nasionalidade Indonésia, ho naran Mial Baliebata Armand ho idade 38. Mial hahú lidera DIT FC bainhira partisipa mós iha jogu Copa FFTL no taxa 12 Novembru tinan 2020.
Tanba ne’e, iha tinan 2021 DIT FC nafatin fó fiar ba treinadór ne’e atu lidera ekipa DIT hodi hasoru liga tinan ne’e to’o remata. (Vidal).
About Post Author
