DILI – Ekipa Ponta Leste sei rekruta jogador estranjeiru nain tolu husi Indonesia no local nain rua iha janela transferensia ne’ebe mak publika ona husi oragaun Liga Futebol Timor Leste tinan ne’e.
Treinador Ponta Leste Eduardo Pereira hatete razaun rekruta jogador estranjeiru nain tolu ne’e atu ajuda lina kotuk defeza no avansadu Ponta Leste nian ne’ebe mak durante ne’e monu.
“Jogador nain 5 ne’e mak nain tolu mai husi Indonesia no rua Ponta Leste tau matan hela ba jogador husi klubu segundu divizaun” dehan Eduardo ba jornalista iha Bairu Grilos Xanana Sport Center sesta (08/01)
Nia informa Ponta Leste mos fó opurtunidade ba jogador balun atu muda ba klubu seluk tanba jogador sira ne’ebe mak durante ne’e tur deit iha banku suplente bele buka fali klubu seluk.
“Hau fihir ona jogador nain tolu iha Ponta Leste atu livre husi janela transferensia tinan ida ne’e ba klubu seluk, maibe sei bolu sira treinu hodi fo hatene ba jogador antes ba muda husi Ponta Leste.” dehan nia
Treinador sublina katak manajamen klubu mos kontakto ona ho eis jogador Ponta Leste Daniel Dongkor husi Gana maibe jogador refere sedauk fo resposta atu fila mai hamutuk ho Ponta Leste.
Kona ba jogador nain rua husi klubu segundu divizaun treinador refere seidauk bele fo sai ba media tanba sei iha hela negosiasaun. (Eug)
About Post Author
