Dili-provizoriomente ukun iha tabela klasifikasaun grupu A, Académica Fc mak lidera, hafoin halakon Zebra Fc ho skor 3-1 iha jogu jornada dahat Liga Futeból Timor Leste (LFTL) segunda devizaun nian.
Jogu entre Académica Fc kontra Zebra Fc, Tersa Feira (09/11) ne’e iha stadium Munisipal Dili oras tuku 04;00 tl loraik, hafoin jogu hahú primeira parte ekipa rua tun ho tátiku no ritmu jogu kuaze hanesan, tanba bola husi ain ba ain.
Maibé Académica Fc halo kontra atake makas ba area Zebra Fc nian hodi halo mós ameasa.
Hafoin ih minutu 27 ekipa Zebra Fc halo kontra atake fila fali, nune’e jogadór Estevão Soares, aproveita lori bola husi liña klaran hodi fura kedas rede Académica Fc nian hodi hatur skor dahuluk 1-0.
Golu refere halo ekipa rua nia jogu manas liu tan, tanba Académica Fc esforsu buka atu responde golu ne’ebé sira sofre, no Zebra Fc buka atu aumenta tan golu, maibé la iha golu ruma ekipa ida-idak mantein liña defeza metin.
Tanba ne’e to’o jogu primeira parte remata, Zebra Fc lidera 1-0 ba Académica Fc.
Depois de hakat ba jogu segunda parte, Académica Fc responde hikas golu ida, liu husi jogadór Juvinal Boavida iha minutu 52 hodi muda skor ba 1-1.
Académica Fc atu asegura sira husi derota, tenki aumenta tan liña oin, hodi dada sai Deonisio da Costa no hatama Martino Vaz.
Ekipa rua kontinua joga hodi halo ameasa ba malu nia rede ida-idak nian no la rejulta golu ruma tanba hetan tenta husi defeza.
Maibé iha minutu 80 Academica Fc responde tan golu daruak, liu husi jogadór Helder Lopes hafoin aproveita bola barullu iha liña 16 Zebra Fc nian hodi muda skor ba 2-1.
Zebra Fc atu asegura sira nia ekipa husi derota, tenki halo subtituisaun ba nia jogadór, maibé la lori rejultadu ruma ba sira nia ekipa.
Sorte nafatin ba Académica Fc, tanba jogadór Pascoal Fernandes fura tan rede Zebra Fc nian, banhira aproveita bola barullu iha baliza oin ekipa adversáriu nian iha minutu 86.
Golu ikus husi Academica Fc nian lori vitória ba Académica Fc ukun ho skor 3-1. Vitória ba Académica sai ekipa ne’ebé provizoriu ukun iha grupu A, no hein de’it hakat ba final hodi deside atu promove ba ekipa primeira divizaun.
About Post Author
