DILI – Prezidenti Assalam FC Ipolitu Soares hatete jogador Osorio da Costa transferensia ba Lalenok United la tuir prosedimentu transferensia Liga Futebol Timor Leste nian tanba jogador refere nia kontratu sei validu tinan rua iha Assalam.
Tuir prezidenti katak lolos ne’e jogador Osorio transferensia ba Lalenok tenki halo karta ida mai klubu anterior tanba antes ne’e klubu rua sei iha hela negosiasaun ho jogador refere.
“Tan ne’e Assalam rekoñese Osorio halo transferensia ba Lalenok United la tuir prosedimentu Liga Futebol Timor Leste” relata Ipolitu ba Desportu XYZ liu husi via menzajen Whatsapp Segunda (18/01).
Nia haktuir la tuir prosedimentu tanba jogador no klubu bainhira atu selebra Asina kontratu transferensia, jogador tenki lori ho karta release husi klubu anterior para labele sai polemika depois de asinatura.
Tanba jogador Osorio da Costa nian kontratu ho Assalam sei validu hela tinan rua, no nia seidauk bele muda ba klubu seluk wainhira kontratu seidauk remata.
Ho kestaun ne’e Asslam sei buka meius oinsa atu resolve ho klubu Lalenok hodi hare ba prosedimentu legais Liga nian atu nune’e klubu no jogador tenki hanoin profesional, nia dehan
Keta regra liga nian mak la’o hanesan ne’e ita la hatene, maibe hau sujere ba oragaun Liga Futebol Timor Leste tenki tau regras ne’ebe mak klaru ba prosedimentu transferensia atu nune’e jogador no klubu sira wainhira atu selebra asina kontratu jogador bele lori ho karta release husi klubu anterior.”
Fo hanoin katak jogador Osorio da Costa muda husi klubu antigu Café iha 2016 ba hamutuk ho Assalam iha 2017 to mai 2020.
Iha fulan Janeru 2021 Lalenok United rekruta jogador Osorio da Costa liu husi janela transferensia ne’ebe mak loke husi Liga futebol Timor-Leste iha dia 01 Janeru to 31 fulan ne’e. (Eug).
About Post Author
