DILI – (Desportu XYZ) – La haforsa husi avansadu prinsipál Mouzinho da Lima no Trenador Juliao Fernandes, maibé Ad SLB Laulara konsege halakon nia adversariu Assalam FC ho eskor 2-1 iha jogu kontinuasaun Primeira Divizaun Liga Timorense ne’ebé mak hala’o iha estadiun munisipal Dili Kinta, 30 Marsu 2023.
Jogu hahú Assalam FC ne’ebé mak tun ho jogador estranjeiru halo uluk ameasa dala rua bá AD SLB liu husi Martinho Belo no Elias Mesquita, maibé bola rua ne’e sei salva husi guarda rede Andrew Mensah.
Maibé AD SLB halo ataka fila bá grande area Assalam, ikus mai jogador estranjeiru Michel Hutabarat les rede Assalam FC liu kabesada iha menutu primeiru, hafoin simu asistensia bola husi Bakyoka hodi lori skor bá 1-0.
Sofre ona golu ida, maibé Assalam FC la hamate sira nia jogu tanba tensi jogu entre ekipa rua la deferente.
Hafoin liu de’it minutu 39 Assalam FC konsege responde golu ida bá rede AD SLB liu husi Martinho Belo, hafoin hetan husi Elias Mesquita iha liña klaran.
Eskor muda bá 1-1, halo jogu husi ekipa rua komesa hatudu sira nia tatika jogu hodi la fó oportunidade bá malu atu ultrapasa bá ida-idak nia grande area.
AD SLB ne’ebé mak hala’o jogu iha anin leten, ikus mai Zenivio Mota hatudu nia golu furak bá rede Assalam FC liu husi jogu individu hodi hatur Skor bá 2-1 to’o primeira parte termina.
Bá segunda parte treinador Assalam FC Gaspar Amaral muda hanoin lalais hodi hasai avansadu Lourensu Freitas hatama fali Bonarudin Amin halo jogu Assalam FC iha fali anin leten.
Iha minutu 65 balun Elias Mesquita lansa falta iha garis penalidade kotuk, maibé bola ne’ebé nia suta sei salva husi guarda rede Andrew Mensah.
Ho ameasa ne’ebé mak Assalam FC konsege hatun AD SLB nia jogu, maibé Assalam FC nia defeza importante Francisco tenki hetan kartaun mean, hafoin komete eru kontra Jhon Fryth.
Laiha tan golu ruma bá ekipa rua to’o jogu termina vitória bá AD SLB ukun ho Skor 2-1.
Rezultadu ne’e lori AD SLB rekolla ona pontu 11 no metin iha fatin primeiru tabela klasifikasaun, enkuantu Assalam FC mantein segundu ulugar iha tabela klasifikasaun ho pontu 8.
About Post Author
