DILI-ekipa Femenino Ad SLB Laulara save titlu kampiaun ba tasa Rosa Muki Bonaparte tinan 2021, hafoin hamonu nia adversario S’Amuser 4-3 iha estadiun munisipal Dili sabadu (08/01)
Iha jogu primeira parte ekipa Ad SLB ukun ho eskor 3-1,no golu refere marka husi Elvira da Silva minutu 7, Elvira da Silva 23,Elvira da Silva 41,no S’Amuser nian marka husi Anina Costa minutu 18, enkuantu iha segunda parte golu ida marka husi Julia Belo minutu 46, no golu rua husi S’Amuser marka husi Celila Godinho 56 no Dolores 86.
Hafoin jogu remata Sekretario Jeral Ad SLB Domingos Caero hatete, iha tasa Rosa Muki Bona Parte ne’e ba dala rua, no tinan uluk ami la konsege sai kampiaun hodi hetan deit segundu lugar, maibé tinan ne’e Ad SLB senti kontenti bele sai fali kampiaun.
“resultadu husi jogu ohin ne’e ekipa Ad SLB hatudu jogu iha primeira parte diak tebes, maibé iha segunda parte ekipa Ad SLB nia jogu komesa tun hodi sofre golu rua tui-tuir malu”
Domingos hatutan, iha segundu parte Ad SLB nia jogu monu, tanbá ekipa komisaun organizadora iha failansau uituan, bainhira jogu hahu fali oras 15:00. maibé tuir lolos jogu liga feto ne’e bele halo iha 14:00.
Nia promete iha epoka tuir mai Ad SLB sei esforsu maka’as liu tan hodi sai kampiaun ba Liga Fútebol Timorense Femenino iha tinan oin.
Sorin seluk treinador S’Amuser Oligio Dos Santos informa, ekipa durante ne’e halo preparasaun diak, maibé ami hasoru dezafiu bainhira orario jogu muda monu los ba tempu feriadu Natal no tinan foun halo jogador sira mos uza tempu hodi halimar iha foho.
“ami nia preparasaun loron ida deit iha dia 06 no dia 07 preparasaun rekoperasaun hodi ohin ami jogu,maibé hanesan treinador la triste tanbá jogador sira hatudu nafatin jogu diak hodi hetan resultadu ho eskor mihis 3-4 kontra Ad SLB.
Fo hanoin deit katak, iha jogu final Tasa Rosa Muki Bonaparte ne’e komisaun organizadora atribui premeu ba kampiaun Ad SLB hetan orsamentu $ 5,000.00 no segundu lugar S’Amuser hetan $ 3,000.00.
Enkuantu premeu ba kampiaun segundu divizaun LTFF As Baucau hetan medalha ho orsamentu $3,000.00 promovidu ba primeiru divizaun LTFF, segundu lugar VDL Lahane ho montante $2,500.00, terseiru lugar Maudoko Fc ho montante $2,00.00 enkuantu quartu lugar Unital fc ho montante $1,000.00.
Entertantu Top eskor ba premeru devizaun LTFF tinan ne’e monu ba jogador Buibere Fc Nilda Reinaldu ho golu hamutuk 16 no primeiru ho montante $1,000.00 no Best Player monu ba jogador S’Amuser Dolores V.Silva Costa hetan montante $1,000.00 no ikus liu atribuis mos Best Player ba guarda rede S’Amuser Madalena Soares ho montante $1,000.00
About Post Author
