DILI – Se karik governu kontinua estende tan Konfinamentu Domisilariu husi 2 Setembru to’o fulan oin, Federasaun Fútebol Timor Leste (FFTL) foti desizaun hodi hato’o karta ba Ministeriu Saude atu husu autorizasaun ba jogador selesaun nasional sub 23 nia viazen ba munisipiu Manufahi hodi halo treinamentu.
Adjuntu Sekretario Jeral FFTL Frederico Martins hateten, foin lalais ne’e federasaun halo kontaktu ho munisipiu Bobonaro atu haruka jogador selesaun nasional sub 23 atu halao treinamentu iha estadiun Malibaka Yamato, maibé ami kansela tia tanbá besik liu fronteira no mos distansia dok.
“Ho situasaun ida ne’e ami kontaktu ba Asosiasaun Futebol Manufahi tanbá besik, maibé federasaun sei hein karik mak governu kontinua estende tan Konfinamentu Domisilariu iha Dili ami sei prepara karta ida ba Ministeriu Saude atu husu autorizasaun ba jogador sira atu halo viazen” relata Frederico ba jornalista iha Bairu Grilos tersa (31/08).
Nia informa, konaba jogu Liga Fútebol Timorense Femenino ita bele muda orariu, maibé treinamentu ba selesaun nasional labele halo mudansa tanbá kalendariu fiksu husi AFC nian katak jogu kualifikasi AFC cup sub 23 sei hala’o iha 27 Otuboru 2021 iha Singapura.
Tanbá ne’e federasaun mos halo ona kontaktu ida ho pontu fokal federasaun nian iha Sentru Integradu Gestaun Krizi atu halo teste swab ba jogador hotu molok halo viazen.
Fo hanoin deit katak, jogu kualifaikasi AFC cup sub 23 Timor Leste monu iha grupu H. hanesan Korea Republic, Singapura, no Philipines.
About Post Author
