DILI – Inkontru tri-parti entre Federasaun Futebol Timor-Leste (FFTL), Liga Futebol Timor-Leste (LFTL) no Sekretariu Estadu Juventude Desportu (SEJD) atu buka solusaun oinsa mak federasaun no liga atu serbisu hamutuk hodi lori futebol ba oin.
Tuir Sekretariu Estadu Juventude Desportu Abrão Saldanha informa, inkontru entre FFTL, LFTL no SEJD lao positivu tebes, tanba hanesan governu kontente katak mehi ne’ebé mak uluk hakarak lori futebol ba oin agora iha dalan ona atu sai profesional liu tan.
“Governu nia hare ba FFTL no LFTL ohin konkorda malu ona atu serbisu hamutuk hodi bele hahu fali Liga ne’e lao ba oin” relata Abrão ba jornalista iha eis sinional SEJD, Tersa (09/02).
Nia hatete governu garantia parte FFTL no LFTL bele sai organizasaun ida deit atu bele dudu futebol ba oin, tanba ohin sira mak konkorda malu hakarak serbisu hamutuk.
Maibe semana ida ne’e sei iha proposta konkreta ida atu lori ba ezekutivu husi parte rua ne’e atu deskuti hamutuk hodi avansa kalendariu ida hodi planea ba liga ne’e rasik.
Governante ne’e afirma desizaun governu agora foti ne’e mak transize ona orsamentu ne’e ba FFTL no husu federasaun nia komitmentu ba kustu Liga nian, tanba governu asumi orsamentu 50% deit, dehan nia.
“Agora ne’e la’os governu mak responsavel mesak, maibe FFTL mak sei tau orsamentu 50% tanba governu sei hare ba premiu do jogu no funsionariu sira ne’ebé mak serbisu iha liga refere.”
Sorin seluk prezidente FFTL Fransisco Jeronimo relata, inkontru ida ohin ne’e husi Federasaun no liga konkorda malu ona atu serbisu hamtutuk, maibe seidauk tur hamutuk ho ezekutivu atu foti desizaun.
Konaba osamentu ne’ebé mak governu tau 50% no federasaun tau 50% hanesan prezidente federasaun prontu simu responsabilidade atu lori klubu sira ezisti nafatin iha Liga hodi promove klubu sira bele sai profesional liu tan. (Eug).
About Post Author
