Dili – Ekipa Emmanuel Fc hanesan ekipa segundu divizaun, ne’ebé akumula iha grupu D, hamutuk ho AD.SLB Laulara, Boavista Fc, Lika-Lika Fc, no Kablaki Fc, ba kopa FFTL tinan ne’e.
Nune’e, istória moruk ba Emmanuel ba kopa tinan ne’e, tanba derota dala rua no impata dala ida no jogu ikus, rekolla pontu tolu, liu husi ekipa adversáriu Kablaki Fc ho skor 3-0, no total pontu 4.
Tuir treinadór Emmanuel Fc Januario de Almeida iha nia konferensia imprensa dehan, ho rejultadu ne’ebé sira rekolla iha jogu ikus ne’e hanesan motivasaun ba jogadór sira, tanba durante ne’e sira derota dala rua no impata dala ida.
“Durante ami nia ekipa joga, jogadór sira laos joga ladiak, maibé ida ne’e mak sira nia esforsu, tanba ne’e hanesan treinadór nafatin motiva sira hodi prepara ba ditiru”. Dehan nia iha stadium Munísipal dili- Domingu (11/10/2020).
Januario mós agradese ba nia jogadór sira, tanba iha jogu ikus sira kumpri duni orientasaun jogu durante ne’e sira prepara.
Nia mós promete, ba oin nafatin prepara hodi partisipa iha jogu 12 de Novembru iha fulan oin.
“Fallansu ne’ebé iha nafatin hadi’a, tanba sira mak futuru ninian”. Nia rekoñese.
Treinadór ne’e promete, ba oin sira sei buka tan jogadór di’ak ruma hodi haforsa liu tan sira nia ekipa.
Enkuantu iha jogu ikus ne’e, man of the match monu ba jogador Emmanuel liu husi jogador Luis Gusmão, sente kontente ho titulu ne’ebé nia hetan.
“Titúlu ne’ebé hau hetan ne’e, laos rejultadu hau mesak mak hetan, maibé liu husi serbisu ekipa”. Nia hakotu. (Vidal).
About Post Author
