Dili – Ekipa Sporting FC de Timor kompleta ona jogu ikus kontra Aitana FC, hodi rekolla tan pontu tolu, iha Kopa FFTL tinan ne’e.
Sporting kompleta ona jogu haat iha grupu C, manan tolu no lakon ida, nune’e hodi rekolla pontu 9, ho bola positivu tolu.
Tanba ne’e, Sporting FC de Timor, seidauk serteza atu hakat ba oitavu finais, tanba ekipa Karketu FC, mós rekolla pontu 9, no rejultadu bola kuaze hanesan, nune’e mós ekipa FC Portu Taibesi sei iha oportunidade, tanba hela jogu ida no rekolla ona pontu neen.
Tan ne’e, seidauk hatene loos ekipa ne’ebé mak atu sai kampeaun iha sira nia grupu.
Tuir treinadór Sporting FC de Timor, Moises da Silva hateten, nia ekipa atu hakat ba oitavu finais, sei hein jogu ikus, FC Portu Taibesi kontra Akademik.
“Tuir hau hatene deklarasaun husi FFTL ba media ne’e katak, sura head to head, laos sura golu, se head to head, Karketu laos manan deit ami, Portu mós manan sira no ami mós fila manan Portu”. Hateten treinadór ne’e iha fatin konfrénsia imprensa iha stadium Munísipal Dili-Sabádu (03/10/2020).
Treinadór ne’e mós husu ba FFTL, atu utiliza lós senáriu ida ne’ebé mak hodi deside ekipa ne’ebé ho rejultadu pontus hanesan hodi hakat ba faze oitavu finais.
Tanba ne’e, treinadór ne’e afirma, sira nia parte hein deit jogu ikus hodi determina loloos ekipa ne’ebé mak atu sai kampeaun hodi hakat ba faze tuir mai.
Enkuantu treinadór ne’e, dehan tan, manan ekipa adversáriu Aitana ho skor 3-1 ne’e, sei garante katak nia ekipa hakat to’o faze oitavu finais.
“Sura head to head, ami nain tolu ne’e manan malu, laos impata tanba ne’e ita sura oinsa, ne’ebé ami manan Portu 2-0, no Karketu manan ami 2-1, entaun ami hela poin Ida”. Dehan nia. (Vidal).
About Post Author
