Desportu.xyz – Tuir vise Presidente Aitana FC João Semantha informa, Edit Xavio fila fali ba klubu anterior Aitana Fc, hafoin Boavista Fc haruka karta ofisiál ba daruak ba órgaun Liga Futeból Timor Leste (LFTL), hodi la tuir liga timorense époka tinan ne’e.
Iha entrevista via WhatsApp, Segunda (19/10), vise Presidente ne’e informa, loos duni katak, jogadór ho liña avansadu iha Boavista ne’e deside fila fali mai Aitana Fc, hodi haforsa fali ekipa refere ba liga époka tinan ne’e.
“Kona-ba alin Edit Xavio nia prezensa mai Aitana Fc ne’e loos. Ami halo ona komunikasaun ho nia, no nia konkorda katak prontu atu haforsa ekipa ne’e ba liga Timorense époka tinan ne’e”. Informa vise Presidente ne’e liu husi mensajen via WhatsApp.
Nia haforsa, relasiona ho jogadór seluk ne’ebé joga iha Boavista, daudaun ne’e sira halo hela komunikasaun atu haforsa tan sira ekipa.
Agora ami halo hela komunikasaun, karik serteza mak ami informa.
Enkuantu, antes ne’e Aitana Fc, liu husi nia pájina Facebook fó sai ona katak, Bemvindu ba Edit Xavio tanba fila fali ba nia klubu anterior hodi haforsa ekipa refere, tanba Boavista Fc de Timor ho naran estimadu Parternas Negras desidi hodi la tuir kompetisaun liga futeból Timor Leste époka tinan ne’e.
To’o notisia ne’e hatun, desportu.xyz seidauk hetan konfirmasaun lolos husi jogadór ho liña avansadu iha Boavista Fc de Timor, Edit Xavio, nia reposta loloos (Vidal).
About Post Author
