Dili – Treinadór Assalam Fc, Carlos Ximenes afirma, lakon ka manan ne’e hanesan matéria ida hodi prepara ba futuru, tanba jogu sei mai nafatin.
Tuir treinadór ne’e katak, nia ekipa prepara di’ak no másimu tebes, maibé ekipa adversáriu konsege manan sira, tanba ne’e nia agradese ba jogadór Boavista, tanba sira bele manan jogu ida ne’e.
“Sira manan ami ne’e hanesan esperiénsia ka matéria ida ba ami hodi hadi’a, di’ak liu tan iha jogu sira tuir mai”. Dehan treinadór ne’e hafoin remata jogu iha stadium Munisipál Dili, Sabádu (14/11/2020).
Nune’e mós treinadór ne’e esklarese, nia jogadór ‘Jhonpe’ hatun fila fali ba liña defeza, ho razaun hakarak defende tan nia ekipa, maibé sira la konsege halo empata nia ekipa adversáriu, maibé Boavista konsege manan sira ho skor 3-2.
Entretantu kapitaun, Assalam, Almerito Aleixo da Silva mós rekoñese, lakon ka manan ida ne’e mak jogu, tanba jogu ida tenki manan no lakon.
Kapitaun ne’e mós fó parabens jogadór Boavista, nune’e ba nia ekipa rasik tanba bele hatudu sira rítmu jogu iha primera parte hodi lidera uluk golu 1-0, maibé hakat ba jogu segundu parte lakon skor 2-3.
Tanba ne’e, nia mós promete, ba oin sira sei esforsu trenu hodi prepara ba Liga iha tinan oin mai.
Assalam antes ne’e lakon ona ho Boavista iha oitavu finais ba jogu Copa FFTL, iha fulan hirak liu ba, maibé iha tan taxa 12 de Novembru nafatin ekipa hasoru malu, maibé Assalam la responde derota ida ne’e, tan ne’e Boavista nafatin hakerek iha nia istória, tanba nafatin halokon nia.
Tanba ne’e, kapitaun Assalam dehan, lakon ida ne’e la hamate sira nia espírtu atu treinu, maibé hanesan jogadór nafatin firme hodi prepara ba jogu sira tuir mai. (Vidal).
About Post Author
