Dili – Treinadór Nagardjo Fc, Miguel Santos Soares dehan, sei uza tátiku di’ak hodi manan ekipa adversáriu Lalenok United iha jogu abertura ba taxa 12 de Novembru tinan ne’e.
Tuir treinadór ne’e katak, daudaun ne’e sira nafatin halo preparasaun hodi hasoru Lalenok United ba jogu ne’ebé sei akontese iha sexta (13/11) semana ne’e nia laran.
“Ami sei prepara tátiku ne’ebé di’ak hodi hasoru Lalenok, no sei uza mós fallansu ne’ebé iha, nune’e bele aproveita hodi produs golu ruma”.
Treinadór hato’o lia hirak ne’e iha konferénsia imprensa iha Xanana Sport Center, Kuarta (11/11/2020).
Treinadór ne’e mós rekoñese, ekipa Lalenok nia jogadór mesak di’ak, tanba ne’e sira sei uza tátiku ne’ebé di’ak hodi hamate Lalenok nia jogu liña avandu, nune’e bele manan jogu refere.
Jogu taxa 12 de Novembru, hanesan jogu ne’ebé joga ho sistema out, bainhira ekipa ida lakon ho ekipa seluk, tanba ne’e Nagardjo hanesan ekipa ida hasoru kedas nia adversáriu sigante Lalenok United iha jogu abertura, maibé treinadór Nagardjo ne’e firme hodi dehan, maske ema wa’in alarma ona katak nia ekipa hein de’it simu golu, maibé, ho fiar áan nia afirma, Nagardjo mantein nia rítmu jogu tanba jogu iha jogadór 11 hasoru 11, se wainhira oportunidade iha nia ekipa bele produs golu.
Nune’e mós kapitaun Nagardjo, Evangelino da Costa reforsa, hanesan jogadór sei mantein instrusaun ne’ebé treinadór fó ona ba sira hodi responde saida mak treinadór nia hakarak.
“Ami nu’udar jogadór prontu atu hasoru ekipa sigante ne’e”. Nia promete.
Kapitaun ne’e mós iha tarjetu hakarak manan iha jogu abertura ne’e rasik, liu husi golu ida ka rua, tanba ne’e hanesan motivasaun ba sira hodi atinji saida mak sira hakarak. (Vidal).
About Post Author
