Manufahi – Arbitru 21 husi Asosiasaun Fútebol Manufahi simu formasaun nivel D husi Federasaun Fútebol Timor-Leste (FFTL) hodi prepara ba jogu komunitariu ne’ebé mak sei realiza iha loron 28 fulan Agostu tinan ne’e.
“Programa formasaun ida ne’e husi federasaun no liu husi diresaun arbitrazen hodi mai fo kapasitasaun ba joven sira atu halo selesaun ba arbitru sira hodi prepara jogu ne’ebé mak AFM atu realiza iha 28 Agostu tinan ne’e” relata instrutur Aniceto Berlelo ba jornalista iha Manufahi, Tersa (10/08).
Nia dehan, total arbitru ne’ebé mak tuir formasaun ho nivel D hamutuk 21, feto 2 no mane 19, maibe husi 21 ida ne’e sei halo selesaun hodi define se mak atu pasa formasaun refere.
Tanbá ida ne’e mak Asosisaun Fútebol Manafahi sente katak jogu ne’e presiza duni arbitrazen, FFTL direta halo planu ida hodi mai fo programa arbitru refrei nian durante semana ida.
“Arbitru sira 21 ne’e laos foun, maibé arbitru balun ho ona nivel D kontinua nafatin ho nivel D, sira foun presiza duni sertifikadu nivel D atu legaliza iha federasaun no mos asosiasaun hodi bele realiza jogu”.
Aniceto haklaken, kona ba orsamentu ba formasaun refere mai husi Federasaun Fútebol Timor-Leste (FFTL).
Sorin seluk formador arbitru Dolia Tereza hateten, durante formasaun semana ida nia laran ami sente kontenti tebes no agradese bele hetan oportunidade hodi aprende buat barak ona kona ba arbitru nian husi formador sira.
Hanesan feto ne’ebé mak gosta duni desportu hare ba durante ne’e kuaze mane deit, maibé ami senti orgullu tanbá laos mane deit mak bele no feto mos bele involve iha parte arbitru nian.
About Post Author
