DILI-Amante Fútebol sira husu Asosiasaun sira lebele hili sala no tenki fihir didiak Kandidatura ba prezidenti Federasaun Fútebol Timor Leste (FFTL) periodu 2022-2026, tanbá tinan barak ona asosiasaun no juventude hotu iha munisipiu sai vitima. tanbá Fútebol konserta deit iha nasional.
Tuir amante Fútebol Jose Carvalho hateten, hau fiar asosiasaun sira laos labarik tanbá kuaze tinan 20 ona sira mai hatene saida mak akontese fútebol agora lao oinsa.
“ita hotu hatene asosiasaun sira sai vitima, tanbá sira nunka senti saida mak kompetisaun bainhira kompetisaun lao deit iha nasional no asosiasaun sira hamrik hanesan boneka ida hodi apoiu deit sira nia kandidatura atu alkansa deit sira nia objetivu ne’ebé mak laklaru” dehan Jose ba jornalista iha kampu demokrasia segunda (10/01)
Carvalho haktuir, tempu to’o ona asosiasaun hamrik hodi hare ba buat los no lia los, tanbá durante ne’e vitima ne’e juven pratika Fútebol iha munisipiu laiha fatin kompetisaun laiha organizasaun ida mak jere didiak.
“ita rona prezidenti atual FFTL hatete osan ba asosiasaun kada fulan mil dolar, ida ne’e ba hau sufsiente, tanbá ne’e ba pratikante Fútebol hotu liuliu prezidenti asosiasaun sira loke ona matan katak juventude ne’ebé pratika Fútebol labele sai tan vitima iha prosesu ida ne’e”
Nia mos husu ba juventude Fútebol sira atu labele sai vitima tan iha tinan 10 mai tan, tanbá agora ita iha planu tinan 10 mai ne’e saida mak ita hotu nia tarzetu. Se karik mak hotu-hotu hakarak apoiu deit kandidatu ida ne’ebé laiha vizaun.
Sorin seluk Sekretario Jeral Ad SLB Domingos Cairu informa, ita hotu iha esperansa atu hetan figura ida diak atu lidera FFTL iha 2022, ita presiza lideransa ida ne’ebé mak iha paisaun ba bola.
“hau nia hakarak mak ne’e ema ne’ebé atu lidera FFTL tenki livre husi buat hotu no labele inklina iha partidu, tanbá ita lakoi tau fali intrese politika iha Fútebol nia laran”
Tanbá ne’e husu ba asosisaun sira tenki fihir lider ne’ebé iha paisaun ba bola, maibé kandidatura nain tolu ne’e mesak iha potensia hotu hanesan, Francisco Kalbuadi Lai, Francisco Jeronimu no Nilton Gusmão.
Cairu dehan, tuir hau nia ponto devista Nilton Gusmão iha esperensia tinan lima iha Liga Fútebol Timor Leste no tenta lori liga amadora ba liga Timorense sggnifka prestasaun ida diak tebes.
Enkuantu Komite eletoral hamutuk ho komite judisiariu anunsia ba kandidatura prezidenti FFTL periudu 2022-2026 hanesan, atual prezidenti FFTL Francisco Jeronimu, Francisco Kalbuadi Lai no Nilton Gusmão.
no tuir data tentativu ba kongresu eletivu sei hala’o iha loron 26 Fevereiru 2022.
About Post Author
