Dili-Aban iha Stadium Munisipal Dili, Domingu (05/12) oras tuku 4;00 htl loro kraik, ekipa As Ponta Leste sei xave ka (tronku) metin jogu importante Ad-SLB Laulara nian husi parte mediu (klaran) no liña avansadu parte loos no karuk, nune’e bele hamate Ad-SLB nia jogu.
Ho fiar-áan treinador As Ponta Leste Francisco de Araújo hateten ba jornalista sira hafoin iha konfrénsia imprensa iha edifisíu Liga Futeból Timor Leste (LFTL) Bairo dos Crilos Bidau, Sexta (03/12) ne’e.
Nia dehan, sira nia preparasun ba jogu kontra Ad-SLB Laulara preparadu no másimu tebes, tanba ne’e nia `ekipa sei hatudu rejultadu ne’ebé di’ak. Maske SLB mós hanesan ekipa ida forte.
“Hau nafatin enkoraja ba jogadór sira katak, labele hare ba Ad-SLB nia jogadór mai ho juvinil, ho sira nia jogu ne’ebé mai ho tátiku jogu pasagem, tanba ne’e ami tenki antisipa iha minutu sira ne’ebé kria oportunidade ba SLB”. Dehan treinadór ne’e.
Nia reforsa, atu optimista hodi hetan vitória laos fasíl tanba ekipa rua hakarak manan iha jogu refere, maibé nia parte sei nafatin motiva jogadór sira atu partisipa másimu iha jogu 90 minutus hodi hetan vitória.
Iha fatin hanesan treinadór asisténte treinadór Ad-SLB Laulara ho naran estimadu “Makikit”, Efren Jerónimo hateten, sira nia preparasaun hanesan baibain no prontu atu hala’o jogu kontra As Ponta Leste.
Hau hanoin ekipa hotu-hotu hakarak manan, maibé 90 minutus mak determina. Dehan Efrem.
Nia dehan, maske As Ponta Leste deskobre sira nia jogu, maibe sira nafatin la’o ho jogu ne’ebé iha no depende ba jogadór ida-idak nia esperiénsia.
About Post Author
