Dili-Representante ekipa segundu divizaun, Dili Institut of Technology (DIT) Fc, hakat mós faze kuatru finais, iha jogu taxa 12 Novembru 2020, hodi hasoru kedas ekipa jigante AD SLB Laulara, iha stadium Munisípal Dili, Domingu (06/12) loraik tuku 4:00 Otl.
Tanba ne’e, tuir treinadór DIT Fc, Mial Baliebata Armand afirma, sira nia nia preparasaun ladun másimu liu, maibé nia indentifika ona SLB nia jogu, husi parte liña klaran mak halo alarma maka’as, nune’e nia sei iha estratéjia ida úniku hodi kaer metin jogadór númeru 6 no 7, atu bele hamate sira nia jogu.
“Hanesan treinadór, sempre haree SLB nia jogu ikus kontra Sporting, tanba sira nia liña parte klaran mak sai xave hodi movimentu bola ho alarma maka’as, tan ne’e mak hau iha estratéjia ida úniku atu haree ida ne’e”. Dehan treinadór ne’e iha konfrénsia imprensa iha stadium Munisípal Dili-Tersa (04/12/2020).
Treinadór ne’e mós rekoñese, maske hasoru ekipa bot, maibé sira nia preparasaun ladun espesiál liu, maibé nafatin prepara hanesan baibain de’it kona-ba tátiku, físiku no mentalidade hodi hasoru ekipa adversáriu iha aban.
“Durante ne’e ita haree SLB hanesan ekipa ne’ebé forte, tanba nia sempre hetan vitória husi ekipa sira seluk, ne’ebé ekipa joga di’ak tebes tanba sira nia ekipa serbisu ne’e unidus tebes”. Nia rekoñese.
Enkuantu treinadór ne’e konsidera, kompetisaun entre AD-SLB ne’e hanesan buat ida espesiál tebes, maibé treinadór ne’e esklarese, sira nia preparasaun de’it oinsa estratéjia atu salva husi ekipa adversáriu nia atake, maibé depende ba jogadór sira nia mentalidade, físiku no tátiku jogu tuir preparasaun durante ne’e iha ona.
Nune’e mós nia esplika, kona-ba liña formatu jogadór sei iha mudansa, tanba sira menus jogadór, tanba ne’e mak sei halo mudansa iha defeza parte husi liña liman los no karuk nian.
Treinadór ne’e mós nafatin optimista, hakarak nia ekipa tenki hakat liu faze ne’e, tanba tuir nia katak, bainhira la iha optimista lalika tuir jogu refere.(Vidal).
About Post Author
