Dili – Asosiasaun Treinadór Futeból iha Timor-Leste (ATFTL), hala’o kongresu dahuluk hodi halibur treinadór sira hotu atu deskute fila fali estatutu asosiasaun nian, nune’eba futuru hodi hare esperiensia husi treinadór sira nian, antes kaer klubu ida no hare problema ne’ebé mak durante ne’e treinadór sira infrenta.
Tuir Manuel da Costa Soares hateten, objetivu husi kongresu dahuluk ne’e atu halibur fila fali treinadór timoroan sira ho sertifikadu nivel D to’o nivel A, nune’e ba oin asosiasaun hahú halo aprosimasaun ho FFTL, kona ba ekipa sira ne’ebé rejistu iha liga ne’e, pelumenus treinadór sira tenki iha sertifikadu antes kaer klubu ida.
“Ita bele hare husi sertifkadu ne’ebé sira iha, tanba ida ne’e atu hatudu katak sira iha esperiensia bele kaer klubu ida, nune’e bele hare kapasidade treinadór ninian ne’e sufisiente ona ka lae, ita presiza hadia ka lae”. Hateten nia ba jornalista desportu.xyz, iha Salaun Sportin Xanana Center, Segunda (31/08/2020).
Tanba ne’e, nia dehan tan, bainhira hadi’a treinadór sira nia kapasidade nune’e ba futuru bele hasa’e prestasaun jogadores sira nian ho di’ak liu tan.
“Bainhira treinadórsira ho kualifikadu, no hamosu ona jogadór sira ho prestasaun ne’ebé di’ak, nune’e jogadores sira bele representa Timor ba joga iha nivel Internasional sira ho prestasaun ne’ebé di’ak”.
Tanba ne’e nia relata, durante ne’e asosiasaun ne’e eziste ona, maibé nia funsaun mak la la’o, tanba ne’e mak sira hahú diskute fila fali nia estatutu, nune’e ba oin bele la’o tuir ona formatu hirak ne’ebé iha ona.
Enkuantu nia afirma tan, liu husi kongresu dahuluk ne’e, hodi diskute fila fali estatutu asosiasaun nian, atu denfende mos direitu treinadór sira nian, tanba durante ne’e treinadór sira hetan problema barak tebes.
“Ami nia observasaun durante ne’e, klubu barak mak la respeitu treinadór sira, tanba ohin sira bolu, aban sira hasai, ida ne’e mak ami lakoi”. Nia afirma.
Nia esplika, asosiasaun ne’e hamrik sai hanesan sumbrina ida ba treinador hotu iha Timor Leste, tan ne’e ba oin sira sei hala’o mos formasaun ba treinadór sira hotu iha Timor Leste, nune’e bele sai profisional liu tan bainhira lidera jogu ruma iha kampu. (Vidal)
About Post Author
