Dili – Treinadór Emmanuel Fc, Januario de Almeida Lasatisfaz ho árbitru nia desizaun hatudu iha kampu laran la justu.
Tuir treinadór ne’e katak, laos nia ekipa hetan derota ne’e mak konsidera árbitru nia desizaun ne’e lalos, maibé tuir nia haree árbitru nia desizaun iha kampu laran hatudu kualidade ladi’ak duni.
“Jogu ne’e atu la’o di’ak nia tenki tau nia-áan hanesan árbitru ne’ebé profesionál antes foti desizaun ida, laos ami lakon mak kolia nia ladi’ak, tanba ninia kualidade ohin ladi’ak duni”. Treinadór ne’e kestiona iha stadium munisípal Dili-Sexta (27/11/2020).
Tanba tuir treinadór ne’e, árbitru ne’ebé lidera jogu entre nia ekipa ho Boavista ne’e, antes ne’e lidera ona jogu entre Zebra ho AD SLB mós hatudu nia kualidade la iha duni.
“Zebra ho AD SLB joga ne’e mós nia lidera akontese hanesan ne’e, ami haree hela, maibé nia la iha mudansa”. Nia preokupa.
Treinadór ne’e mós fó parabéns ba nia jogadór, tanba hatudu duni sira jogu iha kampu laran, maske hetan derota ho scor 3-0.
“Jogadór hotu ohin, maiória husi juvinil, tanba ne’e maske lakon, maibé manan ho esperiénsia ne’ebé di’ak”. Nia rekoñese.
Nia mós informa, derota laos sasukat ba nia ekipa, maibé nafatin simu, nune’e ba oin nafatin hadi’a, tanba jogu tinan oin sei mai nafatin.
Treinadór ne’e mós fó parabéns ba Boavista, tanba bele manan jogu refere.(Vidal).
About Post Author
