DILI – Ekipa selesaun nasionál futeból Timor-Leste senior oras ne’e iha faze preparasaun, maibé iha fatór balun ne’ebé kauza xefe treinadór hakarak diminui senior balun no bolu fali jogadór balun hosi ekipa sub 19.
“Ekipa sub 19 hatudu jogu di’ak no sira iha jogadór barak. Ha’u hakarak atu muda sira mai iha ekipa senior,” deklara Treinadór Xefe, Fabio Joaquim M da silva ba desportu.xyz hafoin ekipa rua halo empate jogu 2-2 iha kampu futeból FFTL semana kotuk.
Nia argumenta, ho prezensa jogadór sub 19, bele hamoris tan jogu iha ekipa senior. Tanba ne’e mezmu nia bolu ona ekipa senior barak, realidade preparasaun seidauk másimu tanba kovid-19 no mós iha rai laran jogu parade dezde termina LFA iha edisaun 2019 nian.
Iha jogu amizade entre senior ho sub 19 iha semana kotuk hatudu katak iha primeira parte ekipa senior domina jogu hodi kontrola bola, maibé tuir fali iha segunda parte hetan esforsu maka’as hosi sub 19 hodi halo atake no hamosu golu resposta 2-2.
“Ha’u la haree rezultadu, no ha’u tenke observa ekipa senior ho ekipa junior, preokupa performa,” afirma treinadór ne’e hodi hatutan atu haree didi’ak kria jogadór foun ne’ebé hatene duni halo jogu.(*)
About Post Author
