Dili – Ekipa Santa Cruz Fc, ne’ebé hala’o ona nia jogu kontinuasaun ba jornáda datoluk, kontra ekipa Assalam Fc, maibé nafatin simu derota ho ekipa adversáriu, tanba simu skor 2-1, tan ne’e seidauk hetan pontus ruma atu hakat ba oitavu finais.
Santa Cruz hela de’it ona jogu ida, kontra Zebra Fc, no derota ona dala tolu, ho ekipa DIT Fc, Lalenok United FC, no Assalam FC.
Tanba ne’e, tuir treinadór Santa Cruz, Olandino de Jesus hateten, nia parte iha esperansa boot atu hetan rejultadu di’ak iha jogu ba jornáda dala tolu ne’e, maibé rejultadu ’90’ minutus determina oin seluk, tanba ne’e sira labele hakat ba oitavu finais.
“Iha jogu ida ohin, hau hanoin ami nia ekipa bele halo balansu hela ho Assalam, tanba iha oportunidade barak atu produz golu, maibé la akontese”. Hateten treinadór ne’e iha fatin konfrénsia imprensa stadium Munísipal Dili, Sabádu (26/09/2020).
Olandino rekoñese, iha jogu primeira parte, nia ekipa falla iha liña defeza parte esquerda nian monu uitoan, tan ne’e ekipa adversáriu aproveita hodi produs golu.
Nia dehan tan, foin hakat ba jogu segundu parte, foin sira muda estratéjia jogu, nune’e nia ekipa foin halo ataka ba ekipa adversáriu hodi produs golu ida, liu husi penalidade.
Treinadór ne’e afirma, ho derota ne’ebé sira simu, la iha ona espasu ba nia ekipa atu hakat ba faze oitavu finais, maibé nia parte dehan sira sei iha jogu ikus kontra Zebra hodi taka jogu ba Kopa FFTL tinan ne’e. (Eugenio).
About Post Author
