DILI – Relasiona ho proposta klubu 20 husi primeru divizaun no segundu divizaun hato’o ba Federasaun Fútebol Timor-Leste atu hasae tan subsidiu, maibé federasaun mantein ho subsidiu anterior tanbá ne’e orgaun Liga Fútebol Timor-Leste (LFTL) halo inkontru hamutuk ho klubu sira hotu atu buka solusaun oinsa atu organiza jogu iha tinan ida ne’e.
Prezidenti LFTL Nilton Gusmão no klubu sira halo press conference hafoin remata reuniaun iha Otel Dili Licedere Segunda (13/09).
“Ohin orgaun Liga Fútebol Timor Leste (LFTL) organiza hodi halo inkontru hamutuk ho klubu 19 husi primeru divizaun no segundu divizaun konaba sira nia proposta ne’ebé mak sira deskuti hamutuk ho Federasaun Fútebol Timor Leste (FFTL) maibé seidauk konvense diak ho klubu sira”
Tanbá ne’e mak hanesan orgaun Liga iha dever atu reuni fali ho klubu sira hodi deskuti hamutuk atu rona direitamente pozisaun klubu sira nian tanbá saida mak sira propoin proposta ne’e.
Nia dehan, orgaun liga rona rasik husi klubu sira no ami sei buka senariu sira ne’ebé mak diak liu para atu bele kontinua ita nia atividade, maibé konserteza ita laos hanoin atu halo Fútebol ho klubu sira atu sai vitima no liga, maibé kualker atividade la’o FFTL hetan benefisiu no mos liga la’o ho atividade diak.
Fútebol la’os klubu nian LFTL no FFTL nian deit, maibé Fútebol ne’e publiku nian, tanbá ne’e ami hanoin ho klubu sira atu halo deklarasaun konjunta ida ne’e para publiku mos kuñese no hatene saida mak atividade Fútebol hasoru no infrenta hela.
“Ita hotu hatene situasaun covid 19 permerte hotu ita nia atividade atu halao, maibé atividade futebol kontinua lao” tenik Nilton.
Nia akresenta, LFTL simu ona apoiu finanseiru husi Sekretario Estadu Juventude no Desportu katak apoiu finanseiru ne’e haruka ona ba FFTL, maibé husi FFTL mai liga ne’e mak to agora seidauk iha serteza ida mai maske orgaun liga hatama ona pedidu ba FFTL maibé respota husi federasaun dehan ami rezolve lai problema.
Sei subsidu ne’e mak FFTL no SEJD la haruka mai iha LFTL, konserteza liga labele lao, tanbá orgaun liga laiha rekursu finanseiru atu organiza jogu.
Sorin seluk porta vos klubu Antonio Sepeda informa, sei subsidiu ne’ebé mak FFTL hakarak mantein, ami husu jogu liga tinan ida ne’e trava tia lai hodi muda ba tinan oin, tanbá ami senti todan liu ba klubu hotu.
Klubu laiha hanoin ida atu la partesipa jogu, ami klubu tenki kuidadu jogador sira nia saúde, tanbá klubu laiha osan atu prepara regras sira husi Organizasaun Saude Mundial konaba Covid 19.
Portavos hatutan, iha semana kotuk prezidente FFTL hatete katak, subsidu ba klubu sira ne’e laiha referensia atu apoiu ba klubu, sim ne’e los.maibé subsidu ida agora ne’e atu apoiu ba liga no mos ba klubu sira ne’ebé atu partisipa iha liga.
Klubu sira hari ne’e ho klubu nia osan rasik, tanbá iha tinan ida ne’e ita hasoru hela problema covid 19, se karik mak laiha kustu atu halo prevensaun ba jogador sira diak liu jogu ba tinan kotuk.
About Post Author
