Dili- Hafoin ekipa Karketu Dili Fc rekolla vitória hanesan kampeaun iha jogu jornada ikus Liga Timorense ba primeira divizaun époka 2021, hafoin halakon As Ponta Leste ho skor 1-0.
Iha konfrénsia imprensa sekretáriu jerál ekipa Karketu Dili Fc Elizeu Isaac hateten, Karketu Dili Fc mak na’in ba Dili atu sai kampeaun no halo istória dahuluk iha kompetisaun Liga Futeból Timor Leste (LFTL), hafoin muda husi naran liga Amadora.
“Atu hatete de’it, Dili nia na’in mak Karketu atu sai kampeaun, kuandu ema dehan fraku ne’e, fraku ne’e mak sira”. Dehan Elizeu iha stadium Munisipal Dili, Tersa (21/12).
Elizeu hateten, ne’e hanesan istória ida, tanba hahú ho Liga Amadora mós Karketu mak hanesan ekipa dahuluk sai kampeaun no época ne’e mós Karketu Dili Fc nafatin sai primeiru kampeaun.
Ekipa seluk sai kampeaun iha munisipiu seluk, maibé Karketu lae, sai kampeaun iha Dili tanba na’in IHA Dili. Tenik nia.
Iha fatin hanesan, asistente treinadór As Ponta Leste, Van Basten rekoñese, derrota ne’ebé sira simu tanba hetan falla husi nia jogadór rasik mak halo auto-golu (bunu diri) ba nia ekipa rasik, maibé tuir nia, jogu hasoru Karketu nia jogadór sira hatudu jogu di’ak tebes.
Ohin ami halo kontra atake maka’as, maibé sorte mak la monu ba ami, maibé monu fali ba Karketu.
Van Basten mós lamenta ho desizaun liña arbitragem sira nian tanba foti bola falta ne’e la justu, tanba tuir nia katak, loloos ba sutu penalidade tanba bola falta ba jogadór Karketu nian iha área 16 nia laran.
Desizaun ne’e ami la simu, ita bele hare video iha kamera media sira nian ne’e.
About Post Author
