DILI- Edit Savio hala’o asaun kontrovérsia no ho susesu la hetan kastigu hosi arbitrajen iha minutu 90 nia laran bainhira kontra AD SLB Laulara foin lalais. Situasaun ne’e dada kedas atensaun hosi diresaun arbitrajen hodi halo xamada ba jogadór hotu-hotu iha Kopa FFTL 2020.
“Law of the game iha bandu jogadór hasai faru iha selebrasaun golu,” Deklara Asesor arbitrajen Vital Bere hodi reforsa diretór arbitrajen Nivio Fernandes iha salaun konferénsia imprensa, iha estádiu munisipál Dili, kinta (27/08).
Iha biban ne’e Nivio esplika, asaun ne’ebé edit Savio halo maka hanesan selebra golu iha minutu 24 hamosu golu hasoru SLB Laulara, hafoin halai mai kumprimenta ofisial iha area tékniku no adeptu sira ho maneira hasai ninia faru (jersey).
Husi biban ne’e árbitru rezerva ne’ebé hamriik iha area ne’ebé besik ho Edit Savio tenta hasee, maibé Edit Savio konsege hatudu liman ba ninia peitu hodi komunika katak aleinde hasai faru, nia mos uza kamizola liman naruk kór metan ne’ebé kór la sees hosi kór farda Boavista nian. (Auguto)
About Post Author
