DILI – Ekipa futeból feto hosi munisípiu Baukau sai ezemplu mezmu sira nia ekipa futeból feto lakon iha jogu hasoru adversáriu SAMUSER-FC maibé kontinua haksolok tanba derrota hanesan sai motivasaun ba sira.
Jogu iha jornada dahuluk ekipa ne’ebé famozu ho naran munisípiu Kulugisa sofre derrota mezmu halo esforsu maka’as iha kampu laran durante jogu hodi hadau valor golu maibé esforsu sei adia hela.
Jogu iha sábadu, tuku hitu dadeer ne’e Ekipa futeból feto hosi Baukau konsidera sira nia derrota lori lisaun ba sira atu prepara aan di’ak liu tan atu hasoru jogu sira tuir mai.
“Ami kontente tanba ami bele lori Baukau nia naran mai iha ne’e” espresa Sonia Maria Ximenes, kapitaun ekipa feto asosiasaun Baukau nian ba Timor Post iha kampu Demokrasia, sábadu (11/07).
Nia konsidera sira ninia partisipasaun nu’udar mosu dahuluk iha kampu futeból kapitál nian reprezenta sira ninia munisípiu.
“Maski ami lakon ami kontente nafatin,” afirma kapitaun nee hodi dehan tan rezultadu derota ne’ebé sira hetan nu’udar motivasaun atu sira bele esforsu hodi treinu.
Nia dehan, antes nee sira halo duni preparasaun no iha esperansa katak sei mai joga iha Dili, nune’e sábadu liu sira ninia esperansa sai realidade.
Mezmu sofre derrota golu 6-0, kapitaun ne’e la hatudu espresaun triste. Jogu tuir mai ami sei esforsu, manan ka lakon ami sei esforsu ba nafatin” nia hakotu.
Rezultadu jogu Asosiasaun Futeból Baukau 0 no golu neen hosi ekipa adversáriu SAMUSER hatama golu rua hosi Sonia Soares da Costa iha minutu (6,11) golu tolu hosi kapitaun, Dolores V da Silva Costa (iha minutu 15,32,39) no golu ikus liu adisiona hosi Tania M F soares iha minutu 56.(*)
About Post Author
