Dili-Boavista Fc de Timor ho Lalenok United, ekipa rua hanesan istória hakerek beibeik ona iha mundu Futeból Timor-Leste nian, tanba ekipa rua sempre hasoru malu iha jogu sira akontese iha tinan hirak liu ba kotuk, hanesan mós foin akontese iha Copa FFTL liu ba, nune’e Boavista tenki simu derota ho Lalenok ho scor 2-3.
Tanba ne’e, iha jogu taxa 12 Novembru tinan ne’e, ba faze kuatru finais ninian, Boavista tenki hasoru tan Lalenok United iha stadium Munísipal Dili-Sabádu (05/12), oras 16:00 Otl.
Ho nune’e, treinadór Boavista Fc, Miro Baldo Bento hateten, jogu kontra Lalenok iha faze ida ne’e, importante tebes hodi deside atu hakat ba faze finais ninian, maibé nia komenta, iha jogadór importante balun sei latun iha jogu aban, tanba ne’e, nia konsidera hanesan preparasaun ekipa nian ladun másimu.
“Boavista sempre hasoru Lalenok, ita haree hanesan foin daudauk iha copa FFTL, ami derota ho scor 2-3, ne’ebé ami hasoru malu tan aban ne’e ba dala haat, ne’ebé ami hakarak esforsu para bele halo istória iha jogu taxa 12 Novembru tinan”. Hateten treinadór ne’e iha konfrénsia imprensa, iha stadium Munisípal Dili-Sexta (04/12/2020).
Treinadór ne’e mós afirma, iha jogu aban derota mós nafatin ho fuan bot atu simu realidade ne’ebé iha.
“Ba hau buat ida lakon ne’e hau lagosta, maibé buat hotu depende jogu iha minutu “90”, mak termina”. Afirma nia.
Enkuantu treinadór esklarese tan, derota ne’ebé sira simu husi Lalenok iha jogu copa FFTL foin liu ba, nia la iha intensaun atu selu fali istória ne’e, tanba bainhira hanoin hanesan ne’e sei fó todan ba nia ekipa, maibé depende ba jogu sei akontese iha minutu 90 nia laran mak termina.
“Ita respeitu jogadór Lalenok nian, tanba sira mós joga di’ak, nune’e mós ami mós mai ho ekipa ida ho jogadór mós joga di’ak, ne’ebé 90 minutu mak deside”. Nia hakotu. (Vidal).
About Post Author
