Dili – Jogu entre ekipa rua, Aitana Fc kontra Portu Taibesi Fc ho skor 1-1 iha periodu normal minutu 90 nia laran no ekipa rua tenke hakat ba suta penalidade, rezultadu Aitana hetan vitória ho skor 4-2, maibé jogadór Aitana ida obrigadu tenki ran suli husi nia adversáriu iha jogu taxa 12 de Novembru tinan ne’e.
Iha jogu primera parte, ekipa rua tun ho rítmu jogu hodi defende ida-ida nia ekipa ho bola pasagem ba malu, maibé ekipa rua la konsege hatama golu ba malu to’o jogu primera parte termina.
Tanba ne’e, depois hakat ba jogu segunda parte, oportunidade monu ba Aitana, iha minutu ’48’, liu husi jogadór Miguel Araújo hodi fura guarda rede Portu Taibesi nian hodi muda skor 1-0.
Nune’e, golu refere halo ekipa rua halo jogu sai manas liu tan, liu husi halo atake ba malu, tanba ne’e defeza Aitana nian halo kontra sala hodi mosu penalidade, maibé jogadór ho naran Armindo de Almeida suta bola as liu baliza, hodi halo adeptus sira triste hodi hakilar nia.
Tanba ne’e, depois de jogu kontinua la’o, defeza Portu Taibesi nian, Octavio Mesquita halo sala kontra tanba lori liman sikun fai jogadór Aitana nian, Fancelino Belo nia matan parte los, kanek no ran sai hodi halo jogadór sira haksesuk malu maka’as, maibé parte husi arbitrazen sira hakalma tiha situasaun refere.
Tanba ne’e, árbitu ne’ebé lideradu husi Francisco Perreira, tenki foti kartaun mean ba jogadór refere hodi sai husi kampu laran.
Ho kartaun mean ne’ebé sira hetan, maibé Portu Taibesi hatudu nafatin sira nia rítmu jogu, hodi halo jogadór Aitana mós tenki esforsu taka makas parte liña kotuk defeza nian.
Maibé oportunidade monu ba Portu Taibesi nia jogadór Van Basten Key, hodi hatama hikas golu iha minutu ’85’ liu husi nia maluk kruza bola hodi muda skor 1-1.
Skor refere halo ekipa rua mantein defende ida idak nia ekipa, tanba ne’e to’o jogu segunda parte termina ekipa rua mantein skor 1-1.
Tanba ne’e, jogu refere tenki remata ho penalidade, maibé sorte áat monu ba Portu Taibesi, tanba sira tenki lakon sutu bola ida, ho nune’e Aitana tenki manan ho skor 4-2, tanba nunka lakon bola sutu penalidade ninian.(Vidal).
About Post Author
