DILI-Orgaun futebol nivel altu Liga Futebol Amadora (LFA) ofisialmente muda ona naran ba Liga Futebol Timor-Leste (LFTL) liu hosi kongresu dahuluk iha Timor Plaza Dili 15 Agostu 2020.
Hateke ba kotuk LFA maka naran ofisial ba kompetisaun liga futeból iha rai laran harii iha tinan 2015 hodi hakat mai realiza kedas liga ofisial iha tinan 2016, hafoin de atividade tasa 12 Novembru 2015. Antes ne’e Timor-Leste iha de’it Superliga ne’ebé mosu iha 2005 no lakon fali iha 2006.
Estrutura tuan mai ho ninia dirijente sira hanesan Presidente: Nilton Gusmão dos Santos, Vise-presidente: Alexandre Vong, Diretor kompetisaun: Martinho Ribeiro.
Iha prosesu kongresu, Nilton Gusmão nafatin lidera Liga Futebol Timor-Leste (LFTL) ba periudu mai, tanba hetan konfiansa nafatin husi kongresista sira bainhira partisipa iha komgresu dahuluk ne’e.
Tan ne’e, iha komgresu refere, úniku kandidatura nia de’it mak avansa.
Tuir presidente Assalam FC Hipolito da Costa hateten, iha kandidatu úniku ida de’it, ne’e tanba lalaok rejimentu komgresu mak nune’e ona, tanba ne’e konsege halo votasaun unanimidade hodi hili presidente foun.
“Hau hanoin demokratikamente mak lao nune’e, tanba komgresu ne’e lao furak tebe-tebes”. Hateten presidente Asslam banhira partisipa komgresu iha salaun Suai Room Timor Plaza, Sabadu (15/08).
Nia mos iha esperansa ba presidente re eleitu foun ne’e atu kontinua de’it serbisu hirak ne’ebé nia husik hela atu kontinua nafatin.
“Antes ne’e mós hau kolia ona katak, ita labele fó konfiansa ba ema ida atu lidera buat ruma, ba termu ida de’it tanba dala ruma nia serbisu sira atinji ne’e la hotu, ta ne’e mak ami fó konfiansa nafatin ba nia”. Dehan nia
Tanba ne’e, nia garante ba oin LFTL sei kontinua lao diak liu tan hodi anima adeptus sira iha Timor-Leste.
Nune’e mos observador João Choque hateten, komgresu ne’e lao kapas tebes, tanba sira ho lian ida de’it avansa ho kandidatura uluk ne’e kontinua avansa ba oin.
“Hau nia esperansa ba sira, nafain firme iha sira nia pozisaun, sai lideransa ne’ebé rona malu, no klubes sira nafatin hadia jestaun, tanba ema balu atu ajuda, maibe nia tenke hare jestaun iha klubu nia laran.” Nia rekomenda.
Iha fatin hanesan representate amante futebol José Carvalho mos dehan tan, komgresu ida ne’e hanesan dahuluk, maske la perfeitu, maibe ne’e hanesan prosesu ida dinamiku.
“Ami hare katak espíritu koperasaun ida diak husi parte hotu-hotu, maske iha lakunas oinoin, maibe nafatin kontribui ba malu hodi halo komgresu ne’e lao dak tebes, tanba ema barak hadomi futebol, liu-liu ami amante futebol hakarak futebol buras liu tan”. Nia espresa.
Nia espersansa ba presidente re eleitu ne’e, atu kontinua hala’o nia obra hirak ne’ebé sei iha, nune’e bele alizerse LFTL ne’e ba oin ho diak.
“Iha hanoin balu husi sekretariu estadu katak, ba oin LFTL labele depende ba governu, maibe tenki hamrik mesak ona, maibe sei diskute antes estadu atu husik mesak, tanba estadu tenli kria uluk kondisaun”. Nia rekomenda.
Nia afirma, liga sira ne’e akontese iha rai sira seluk ne’e hanesan ona indusria futebol nian, tan ne’e estadu tenki kria kondisaun oinsa atu hamoris industria futebol iha Timor Leste hanesan infrastrutura, merkadu tanba atu sustenta futebol mai mos husi emprezariu sira liu husi benefisiu ekonomia.
“Hau hanoin, estadu oferese insentivu ba emprezariu sira hodi sustenta futebol hanesan patrosinador, ne’e hanesan responsabilidad atu subtitui knar governu nian, tan ne’e tenki hare situasaun sira ne’e”. Nia rekomenda. (vidal)
About Post Author
