Dili-Premiadu Nobel da Paz, hanesan mós eis Fundador Konfederasaun Desportu Timor Leste (CDTL) dahuluk, José Ramos Horta konsidera área desportu sai hanesan instrumentu diplomasia Timor Leste (TL) nian ba mundu, tanba iha nasaun barak mak uza sai hanesan marketin ba sira nia nasaun.
Premiadu Nobel da Paz ne’e reforsa tan, wainhira nia sei sai hanesan Presidente da Repúblika TL nian, no antes liu ba assume mós pasta hanesan Ministru Negosiu Estranjeiru durante nia mandatu, buka meius oioin atu dezenvolve desportu iha TL.
“Hau gosta desportu, tanba sai mós instrumentu diplomasia Timor Leste nian, tanba nasaun bot sira hanesan Rusia, Xina, Amérika utiliza. Laiha rai ida mak la uza desportu hanesan marketing ba sira nia rai, tanba desportu diplomasia, kultura diplomasia”. Hateten Premiadu Nobel da Paz, José Ramos Horta hafoin partisipa toma pose ba presidente foun, Confederações Desportu Timor Leste (CDTL) iha salaun Xanana Sport Center Bairo do Crilos, Tersa (21/12).
Eis Presidente Repúblika Timor Leste nian ne’e mós sente triste, tanba to’o oras ne’e, governu seidauk iha komitmentu di’ak ba desportu.
Desportu ne’e ita labele hein demais setór privadu, tanba setór privadu foin mak hahú ho ita nia ekonomia sei fraku, entaun sei defisíl. Papél governu importante liu, tanba ne’e liga ho joventude sira, estudante, atu kria estabilidade iha ita nia rain. Dehan Ramos Horta.
Ramos Horta mós afirma, atu hadi’a desportu, presiza iha planu tinan naruk, no presiza tau osan ne’ebé sériu hodi hare mós ba desenvolvimentu desportivu ba oin, inklui presiza formasaun tékniku ne’ebé sériu.
Timor iha jeitu ba desportu, dansa kultura, jinastíka átletismu, tanba joven sira bele sai kultural, diplomata ba mundu, maibé presiza tau matan.
Nia mós hare desportu iha TL sei fraku, entermus de performe atleta sira nian, tanba planu seidauk di’ak atu kria kondisaun hotu promove desportu.
About Post Author
