DILI – Asosiasaun futeból salaun Timor-Leste (AFTL) ofisialmente ofisializa empreza DS Ultimate Strong Beer sai hanesan patrosinadór prinsipál hosi hodi finansia kompetisaun pra liga futsal 2020 iha tempu badak.
“Ami iha devér atu hola parte, ami nia objetivu kontribui dezenvolve atividade desportu espesiál futeból salaun,” deklara Anton Hendrick na’in ba empreza DS Ultimate Strong beer hafoin simu ekipa AFTL iha ninia eskritóriu Bidau Akadiru hun, segunda (21/09).
“Ami agradese ba konfiansa ne’ebé ami simu hodi hola parte tulun atua organiza atividade ho di’ak,” afirma Anton hodi reafirma, karik ba eventu sira tuir mai ninia empreza prontu fó kontribuisaun.
Sekretáriu Jerál AFTL, Fernando Xavier hatete prezensa Patrosinadór prinsipál ba torneiu pra liga futeból salaun maka empreza ne’e.
“Nia maka sai patrosinadór númeru.1 fó mós ho orsamentu montante $5000 (dolar rihun lima)” haktuir Sekretáriu jerál AFTL ne’e.
Iha biban hanesan, Deputy Federasaun Futeból Timor-Leste (FFTL), Frederico Martins maka sai sasin ba prosesu termu entrega orsamentu hosi patrosinadór refere.
“Maski sira (AFTL) foin hahú maibé sira hetan ona patrosinadór, FFTL la haree ba ninia montante, maibé haree liu ba partisipasaun no kolaborasaun ba atividade,” afirma adjuntu sekretáriu jerál FFTL ne’e.
Frederico iha esperansa ho inísu atividade AFTL ne’e sei hatudu rezultadu no ba oin kontinua loke oportunidade atu patrosinadór ne’e kontinua hola parte hodi tulun atividade sira. (Augusto)
About Post Author
