DILI – Coach husi ekipa Manuel FC apresia nia jogadór, tanba ekipa jigante husi Boavista FC fó golu ba nia ekipa menus, kompara ho ekipa boot balu simu golu barak liu.
Tuir treinadór Emanuel Januário de Almeida hateten, nia ekipa derrota tanba sira foin promovidu, tan ne’e jogadór sira nia mentalidade sei menus.
“Ohin ami derrota ho 2-0 ne’e, ba ha’u kontente tebes, tanba hasoru ekipa boot ida mais sira la fó golu barak liu ba ami,” Hateten treinadór ne’e iha fatin konferénsia imprensa stadium Munisipál Dili, Kuarta (03/09/2020).
Tanba ne’e, treinadór ne’e konsidera, nia ekipa derrota ne’e hanesan motivasaun ida ba nia jogadór, atu nune’e, jogu tuir mai bele muda sira nia mentalidade ho di’ak liu tan.
Januário mós rekoñese, nia indentifika ona fallansu hirak ne’ebé nia ekipa hasoru durante iha jogu nia laran, tan ne’e ba oin nia parte sei hadi’a buat balun, nune’e hasoru ekipa seluk iha sira nia grupu bele hatudu rezultadu ho di’ak.
“Ohin sira hare de’it jogadór Boavista nian ho esperiénsia maka’as sira nia mentalidade mós tun, maibé ida ne’e motivasaun ida ba sira”. Nia rekoñese.
Tanba ne’e, treinadór ne’e mós afirma, nia jogadór foin atu kompete hasoru ekipa boot sira iha Copa tinan ne’e, tan ne’e ba oin sira iha planu atu hadi’a tan fallansu ne’ebé sira sei iha. (Vidal).
About Post Author
