Dili-Tuir estatutu Confederação Desporto Timor-Leste (CDTL) nian, artigu 40, alinea 1, kada tinan hat presidente meza Assemblea jerál sei konvoka kongresu atu eleze estrutura foun ba CDTL nian, hodi realiza assemblea jerál ordináriu ida, nune’e bele deside presidenti foun ho mandatu tinan hat iha CDTL.
Tuir atual Presidente CDTL Afranio Xavier Amaral hateten, tuir loloos nia mandatu remata ona iha fulan Marsu 2020, maibé tanba situasaun covid-19, no ita iha hela situasaun estadu emerjénsia, nune’e labele realiza kongresu ruma, tanba ne’e hodi prolonga hela nia mandatu to’o ohin loron.
“Iha estatutu confederação mós fó dalan ba presidenti iha kompetensia tomak atu kria komisaun ida independente, hanesan Presidenti Assemblea jerál CDTL Aniceto Gouviea Berlelo ne’ebé hili iha fulan Marsu 2017. Tanba ne’e hodi fó despaisu ida ba nia ho knar tomak atu deriji assemblea ne’e sei hahú iha loron 20 fulan Novembru 2021”. Hateten Presidenti CDTL, Afranio Xavier Amaral iha konfrénsia imprensa iha edifísiu CDTL Caicoli, Sexrta (15/10).
Atual Presidente CDTL ne’e mós iha esperansa ba Presidenti Assemblea jerál CDTL ne’e, sei hala’o nia knaár tomak ho imparsial, transparénsia no sei la inklina ba parte ida.
Nia mós husu ba federasaun hotu atu submete sira nia kandidatura hodi kandidata-áan ba presidenti foun ba periode tinan haat.
Nune’e mós iha konfrénsia imprensa komisaun organizadora, hanesan mós Presidenti Assemblea jerál CDTL, Aniceto Gouviea Berlelo informa, prosesu rejistrasaun ba kandidatura estrutua foun sei hahú iha loron 18 to’o 26 Outubru 2021.
Tanba ne’e Presidenti Assemblea jerál CDTL ne’e mós husu ba kandidatu ba presidenti órgaun presidénsia sira, atu prense no submete dokumentu sira hanesan tuir Mai; formulariu kandidatura prezidenti ezekutivu, lista pakote kandidatura, foto koloridu background mutin (4*6) tahan 4, cv, motivasaun kandidatura ba president CDTL (inklui vizaun no misaun), proposta programa ba CDTL durante mandatu tinan 4, deklarasaun kona ba livre husi dupla funsaun iha órgaun desportiva inklui atestadu médiku.
“Verifikasaun dokumentu sei realiza iha husi loron 27 to’o 29 fulan Outubru 2021, no sei anúnsia rejutadu verifikasaun iha loron 04 fulan Novembru tinan ne’e”. Hateten Berlelo
Berelelo mós informa, rekursu ba rejultadu verifikasaun sei hahú iha loron 5 to’o 8, no sei anúnsia rejultadu rekursu iha loron 9 fulan Novembru 2021.
Periodu konsilidasaun husi kandidatura sira sei hahú iha 10 to’o 17 fulan Novembru ne’e, no assemblea jerál sei realiza iha loron 20 fulan Novembru 2021.
Enkuantu kongresu ba CDTL nian ne’e, hala’o ba dala lima. (Vidal).
About Post Author
