Dili-Tuir planu Assosiasaun Profisionál Taekwondo Timor-Leste (APTTL) sei halo teste ka fó ezame troka sintu ba atléta sira ne’ebé sintu mean trazu rua ba metan (DAN I) ho nia partisipante ema na’in 30 liu husi teritoriu Timor-Leste laran.
Tuir representante fundadór APTTL nian, Fin Monteiro hateten, partisipante sira ne’ebé atu halo ezame ne’e mai husi teritoriu laran tomak inklui training center Comoro Ponte 3.
“Sintu mutin ba to’o mean trazu ida mós sei halo ezame truka sintu, ho nia númeru partisipante kuaze ema na’in 500 liu”. Hateten representante fundadór APTTL ne’e, liu husi via WhattApp, Domingu (07/03/2021).
Fundador ne’e mos subliña programa APTTL sira mak hanesan advokasia, audit, koperativa, kursu, web, fo treinamentu ba treinador sira husi munisipiu sira hanesan fresh training, hari training center iha munisipiu hanesan agora dadaun atu harii iha Railaku, tuir mai iha Suai no Munisipiu seluk kada tinan 3.
Enkuantu, daudaun ne’e treinadór iha training center Comoro Ponte 3, hamutuk ema na’in 35.
Nune’e mós vise presidente APTTL Deolindo Fernandes do Rosario mós reforsa, durante sira fó treinu ba atléa sira la’os treinu de’it ba tuku-tebe, maibé loke mós kursu Inglés no Portugés ba atléta sira atu aprende.
Loke kursu ba atléta sira ne’e importante tebes, tanba aban bainrua mak atléta ida representa ita nia nasaun ba rai liur tuir kompetisaun, nia tenki hatene lingua, nune’e bele fasil halo komunikasaun ho ema seluk.(Vidal)
About Post Author
