Dili – Governu, liu husi Sekretáriu Estadu Juventude no Desportu (SEJD), Abrão Saldanha informa, kompania Konsultoria Juz mak sai manan na’in ba elaborasaun projetu Lei foun ba Konsellu Reguladora Arte Marsiais (KRAM), ne’ebé asina kontratu ho governu ho orsamentu $ 31 mil e tal.
Tanba tuir governante ne’e katak, tinan kotuk termina ona nia prosesu, maibé ba tinan ne’e presisa nafatin halo fali konsulta ida kle’an ba Lei ne’e ho entidades hotu-hotu.
“Ita presiza ekipa jurista ida mak atu halo konsulta no ajuda governu atu prepara Lei foun ne’e lori hikas ba Konselu Ministru, nune’e Parlamento Nasionál bele aprova. Ne’e mak ami deside loke konkursu, porque iha ita nia rain ne’e sei iha eskritoriu advogadu, lubuk ida”. Hateten Sekretáriu Estadu ne’e iha nia knaár fatin SEJD-Lecidere, Kinta (28/01/2021).
Nia esklarese, baihira loke konkursu ne’e, iha konkorensia husi kompania hitu mak iha interese, maibé husi avaliasaun, juri sira avalia no vizita to’o sira nia fatin, rekomenda Kompania Konsoltoria Jus mak manan ba projetu refere.
Iha semana kotuk sira asina kontratu ona ho KRAM, tanba ne’e SEJD sei prepara prosesu interna husi governu nian, atu konstitui ekipa interministerial para hamutuk ho eskritoriu konsultoriu juridiku ne’e atu hamutuk ho governu ekipa ministerial ida atu hahu diskute pakote Lei foun ba arte marsais. Nia esplika.
Asesor iha SEJD iha, maibé tanba Lei Arte Marsiais ne’e lei multidimensional, ne’ebe la’os simplesmente jurista ida bele elabora lei ida ho karater mesak.
Tanba ne’e mak iha konkursu ne’e iha termu referensia ne’e ami koloka oinsa atu buka ema ho ekipa, asesor sira ne’e tenki barak, tanba ema tenki hatene kona-ba kestaun pedagójiku tanba arte marsiais atu hanorin ema, ema tenki hatene psikolójiku, ema tenki hatene sosio-antropolójiku, iha prespetiva sira hanesan mak sei iha.
Nia esplika, bainhira rekruta asesor individu, sei rekruta asesor barak, tanba ne’e loke komkursu públiku sira hanesan ne’e mak eskritóriu advogadu sira mak tenki buka sira nia ema, depois apresenta sira nia profile mai hodi halo avaliasaun.
Nia dehan, servisu ne’ebe sira atu hao mak peskiza, konsulta, no ajuda ekipa interministerial lori projetu de Lei ne’e ba apresenta iha Komsellu Ministru nune’e akompaña to’o diskusaun iha plenária.
Entretantu kontatu entre kompania ne’e ho durasaun fulan tolu, maibé depende ba prosesu internu governu nian. (Vidal).
About Post Author
