GLENO-Polísia Nasionál Timor Leste (PNTL), Munisípiu Ermera nafatin fó seguransa ba jogu kopa Federasaun Futeból Timor Leste (FFTL), ba oitavu finais ne’ebé realiza iha stadium Munisipál Kafé Ermera, tinan 2020 sei la’o ho seguru.
Tuir segundu komandante PNTL Munisípiu Ermera, Luzeiro Lay ba jornalista desportu.xyz hateten, relasiona ho seguransa ba jogu ba Kopa FFTL tinan ne’e, ne’ebé realiza iha stadium Munisipál kafé Ermera, seguransa la’o di’ak tebes tanba PNTL halo kooperasaun di’ak ho instituisaun sira hotu.
“Seguransa la’o di’ak tanba ami halo kooperasaun ho Forsa defeza Timor Leste (F-FDTL, seguransa sivíl no mós juventude sira atu asegura seguransa ba kopa ne’e rasik atu la’o ho di’ak”. Hateten Segundu Komandante ne’e, hafoin remata asiste jogu entre AD.SLB Laulara kontra Sporting Fc de Timor, iha stadium Kafé Ermera, Sexta (16/10/2020).
Tanba ne’e, segundu komandante ne’e mós garante, PNTL Munisípal Ermera nafatin asegura seguransa ba jogu ne’e to’o remata.
“Ha’u husu ba adeptu sira, mai asiste karik ne’e jogu ita nian, hatudu nafatin ita nia dixiplina hodi kontribui ba paz no dame mai ita liu husi futeból”. Nia apela.
Enkuantu, Juvêncio Martins hanesan adeptu bainhira partisipa iha jogu AD.SLB Laulara kontra Sporting Fc de Timor hateten, nia parte kontente tebes ho jogu ne’ebé realiza iha Ermera.
“Hanesan adeptu ida iha Ermera, hakarak asiste jogu futeból ne’ebé bele anima ami, tan ne’e husu ba adeptu sira seluk mai asiste bola atu kontente la’ós mai kria problema,” Nia hakotu. (Vidal).
About Post Author
