Dili – Jogadór Liña klaran (mediu), númeru 6 ho naran Mohhamed Momin, tenki hetan Kartaun Mean husi jogu kontra ekipa adversáriu Santa Cruz, banhira iha minutu ikus ’90+1’, ba extra nian.
Árbitru ho naran Francisco Pereira ne’ebé lidera jogu ne’e, hi’it kartaun mean ba jogadór refere, tanba kontra sala, ‘tebe kona defeza Santa Cruz nian, parte kelen hodi monu iha liña 16 Santa Cruz nian.
Antes ne’e, Mohhamed hetan ona kartaun kinur, iha minutu 21, tan ne’e, iha fali minutu ikus jogu atu remata ona, jogadór ne’e komete tan erru, nune’e, árbitu hodi foti desizaun fó tan kartaun kinur dala ida, no dirreta fó kartaun mean ba jogadór refere.
Hafoin jogu termina, jogadór sira hakilar árbitu hodi halo kampu laran manas, maibé official FFTL nian, hakalma tiha situasaun refere to’o situasaun normal.
Tanba ne’e, tuir treinadór Assalam FC, Gaspar Guintão hateten, jogadór ne’ebé hetan kartaun mean ne’e, erru jogadór ida nian, tanba iha jogu ida, banhira joga hahú manas ona sira labele kontra-áan.
“Hau sente jogadór ne’ebé hetan kartaun mean ne’e la fó impaktu ba Assalam, tanba nu’udar treinadór ne’e responsabilidade ba ekipa, laos depende ba jogadór Ida”. Hateten treinadór ne’e iha fatin konferénsia imprensa stadium Munísipal Dili-Sabádu (26/09/2020).
Treinadór ne’e, rekoñese, fallansu ne’e hanesan sira nia parte, tanba ne’e ba oin kontinua hadi’a, nune’e labele akontese tan.
Maske jogadór Assalam nian hetan kartaun mean, maibé treinadór iha optimista nafatin hakarak nia ekipa sei hakat ba oitavu finais.
Enkuantu kapitaun Assalam, Almerito da Silva reforsa, ba sira nia jogadór ne’ebé hetan kartaun mean ne’e la problema, tan ne’e ba oin sira nafatin hadi’a fallansu hirak ne’e. (Vidal).
About Post Author
